"Turan Tovuz"un avrokuboklar üçün son cəhdləri - AFİŞA

Misli Premyer Liqasında 34-cü turun növbəti görüşündə "Turan Tovuz" "Neftçi"ni qəbul edəcək.

Sport1.az xəbər verir ki, turnir cədvəlinin 4-cü pilləsində qərarlaşan "boz qurd" avrokubok şanslarını saxlamaq üçün meydandan sərfəli nəticə ilə ayrılmalıdır. Artıq liqada qalacağı dəqiqləşən və bu mövsüm qitəmiqyaslı turnirdə ölkəni təmsil etmək şansı qalmayan "Neftçi" üçün isə görüş formal xarakter daşıyır.

Bu tərəflər arasında 12-ci qarşılaşma olacaq. Son oyunda komandalar arasında bərabərlik qeydə alınıb - 1:1.

Öncəki oyunların 1-də meydan sahibləri qələbə qazanıb, 5-də isə qonaqlar 3 xala sevinib. 5 matçda isə 90 dəqiqənin sonu sülhlə bitib.

Bu oyuna qədər Tovuz klubu rəqib qapısından 9 top keçirib. "Ağ-qaralar" isə 15 qol vurmaqla buraxdığı topların əvəzini artığı ilə çıxıb.

Paytaxt təmsilçisi "Turan Tovuz"a qarşı son 7 oyunda məğlub olmayıb. Sizcə, məğlubiyyətsizlik seriyası bu gün də davam edəcək?

MURAD ABDULLAZADƏ

Sport1.az