"Dənizçilər"in liqada qalmaq üçün son çırpınışları - AFİŞA

Misli Premyer Liqasında 33-cü turun maraqla gözlənilən görüşlərindən biri Şamaxıda baş tutacaq.

Sport1.az xəbər verir ki, turnir cədvəlinin 7-ci pilləsində yer alan meydan sahibləri autsayder "Səbail"i qəbul edəcək. Bu tərəflər arasında 27-ci qarşılaşma olacaq. Son görüşdə bölgə təmsilçisi səfərdə iki cavabsız qolla qalib gəlib - 0:2.

Öncəki oyunların 8-də "şirlər", 9-da isə paytaxt klubu qələbə qazanıb. 9 matçda isə tərəflər meydandan sülhlə ayrılıb.

Bu oyuna qədər "Şamaxı" "dənizçilər"in qapısından 25 top keçirib. Qonaqlar da öz növbəsində 25 qol vurmaqla say nisbətini bərabərləşdirməyi bacarıb.

"Səbail"in bu oyundan başqa 3 matçının qaldığını nəzərə alsaq, qarşılaşma xüsusi əhəmiyyət daşıyır. 9-cu sırada yer alan "Kəpəz"dən 7 xal az toplayan qonaqlar sonuncu pillədən qurtulmaq üçün görüşdən sərfəli nəticə ilə ayrılmalıdırlar.

MURAD ABDULLAZADƏ

Sport1.az