"Təklifdən 1 həftə əvvəl "Amazon"un anbarında işə başlamışdım

"Şəki" klubunun basketbolçusu Coş Robinson klubun mətbuat xidmətinə müsahibə verib.

Sport1.az xəbər həmin müsahibəni təqdim edir.

– İlk peşəkar karyeranıza Azərbaycanda başladınız. Bu necə baş verdi, ailəniz bunu necə qarşıladı?

– ABŞ-də kolleci bitirdikdən sonra bir anbarda işləyirdim. Bir gün menecerim mənə zəng vurdu ki, mənimlə maraqlanan var. Baş məşqçi mənə müqavilə bağlamaq təklif edirdi. Birinci dəfə bunu eşidəndə şoka düşdüm. Çünki təklif gec gəlmişdi, hazırlıqsız idim. Ancaq mən işdən çıxaraq hər gün hazırlaşmağa başladım. Ailəm və işdəkilər də bunu eşidəndə mənə görə çox şad oldular. Baş məşqçiyə (Bedri Meriçi nəzərdə tutur – red.) belə müqavilə təklif etdiyinə görə minnətdaram.

– Anbarda işlədiyinizi dediniz. Bir qədər izah verərdiniz...

– Təklifdən 1 həftə əvvəl "Amazon" şirkətinin anbarında işə başlamışdım.

– Müqavilə təklifi gələndə ölkə və çempionat haqda nəyi bilməyi istədiniz?

– Dil baryerinin olacağından narahat idim. Çünki bilirdim ki, burada ingiliscə danışmırlar. Çempionat haqda isə bir az məlumat əldə etmişdim. Çünki ötən mövsüm "Sumqayıt"da oynamış dostum mənə məlumat vermişdi. O deyirdi ki, mən Azərbaycanda oynamaqdan həzz aldım və çox şey öyrəndim.

– Doğrudan? Kimdir o?

– Tayri Rendall. Biz kollecdə olanda bir-birimizə qarşı rəqib olmuşuq. Eyni liqada oynamışıq.

– 24 yaşınızı Sumqayıtdan qayıdarkən Hacıqabul rayonundakı restoranda qeyd etdiniz. Bundan öncə ailəniz olmadan, tanımadığınız bir bölgədə ad günü keçirmişdiniz?

– Bəli, ilk idi. Çox fərqli bir hiss yaşadım. Ancaq komanda yoldaşlarım evdəkinə bənzər atmosfer yaratmağa çalışdılar. Biz həmin "Sumqayıt" üzərində qələbə qazanıb Şəkiyə qayıdırdıq.

– Şəkiyə necə uyğunlaşa bildiniz? Sizin şəhərlə Şəki arasında fərqlilik nədədir?

– Adaptasiya çox asan keçdi. Düzdür, Şəki Bakı kimi böyük deyil. Ancaq Şəkidə də mənim ehtiyacım olduğum hər şey var və sakinləri mehribandır. Yaşadığım Dallas isə Texas ştatının ən böyük şəhəridir və Şəkidən çox fərqlənir. Ancaq orada Şəkidəki kimi dağlar və bu kimi təbiət mənzərəsi yoxdur.

– Bilirəm ki, Terens Hanter-Vitfild özü ilə "pley steyşn" gətirib. Bəs siz boş vaxtlarınızda nə işlə məşğulsunuz?

– Mən də adətən "pley steyşn" oynayıram. Bir də gecələr MBA oyunlarına baxıram.

– Keçək basketbola. Cari mövsüm çempionatda cəmi 4 dəfə məğlub olmuşuq. Komandanın gücünü nədə görürsünüz?

– Məncə, komandamız çox sürətlidir və bir kollektiv kimi güclüyük. Komandamızda qələbə qazanmağa kömək edəcək çox oyunçu var. Baş məşqçi də bizə yaxşı müdafiə olunmağı izah edə bilir. Əgər komandada mövsüm ərzində hamı sağlam olsaydı və zədəli oyunçumuz olmasaydı, indi cəmi 1 məğlubiyyətimiz vardı.

– Sabah "Gəncə" ilə oyunda qalib gəlsək, yarımfinala çıxıb tarixə düşəcəksiniz. Biz bu şəhərdə onlara qalib gələ bilməmişik...

– Fikrimcə, ribaundlar hesabına və onların hücumlarının qarşısını almaqla qalib gələ bilərik. İnanıram ki, Gəncədə onları məğlub etməyimiz üçün motivasiyamız var və onları məğlub edəcəyik.

– Siz oyun vaxtı çox emosional olursunuz. 2 dəfə komanda yoldaşlarınızla oyun vaxtı mübahisəniz düşüb. Bu nə ilə bağlıdır?

– Bu, basketbolun bir hissəsidir. Hamımız bir-birimizdən ən yaxşı oynamağı gözləyirik. Belə olmadığını hiss etdikdə, belə xırda mübahisələr olacaq. Hamımız kişiyik. Komandaya sadiq olsaq, heç kim belə problemlə üzləşməz.

– 8 mart sizin üçün özəl gün olmalıdır. Çünki məhz bu gündə XVII turun "Quba" ilə oyunundan sonra peşəkar karyeranızda ilk dəfə MVP seçildiniz. Daha sonra XIX turda "Gəncə"yə qarşı nəticənizi daha da yaxşılaşdırdınız. Hər iki matçda "dabl-dabl" da etdiniz. Maraqlıdır ki, MVP olmağınız Aleks Koldvell komandadan getdikdən sonra baş verdi. Niyə əvvəl bu qədər seçilmirdiniz?

– Düşünürəm ki, Aleks komandadan ayrıldıqdan sonra daha çox oyuna qoşulmalı oldum. O, kapitanımız idi və komanda üçün çox şey ifadə edirdi. Ona görə də o getdikdən sonra komandaya kömək etmək üçün addım atmalı və daha böyük rol almalı olduğumu hiss etdim.

– Gələcəkdə bu uğurlu çıxışınız Avropanın top liqalarından birində çıxış etməyiniz üçün nə qədər uğurlu ola bilər?

– Bu, bir plandır. Məncə, gözəl mövsüm keçiririk və komandaya çox kömək edirik. Ümid edirəm ki, çıxışımla növbəti mövsüm top Avropa liqasında oynamaqla mükafatlandırılaram.

Sport1.az