İqor Ponomaryov: "Bizi çətin mübarizənin gözlədiyini bilirik" - MÜSAHİBƏ

“Sabah”ın Müşahidə Şurasının üzvü və idman direktoru İqor Ponomaryovun Sport1.az-a müsahibəsi...

- Təlim-məşq toplanışından nə gözləyirsiniz?
- Komanda hazırlıqlara yaxın bir neçə gün ərzində başlayacaq. Həmin vaxta kimi bir çox məsələlərə aydınlıq gələcək. Təlim-məşq toplanışı ilə bağlı ən qısa müddətdə ətraflı məlumat veriləcək.

- Səs-küylü transferlər gözlənilirmi?
- Əlbəttə! Yeni transferlər gözlənilir. Biz komandaya futbolçu cəlb edərkən onun ad-sanına yox, komandanı nə dərəcədə gücləndirməsinə diqqət yetiririk. Bu sahədə bizim seleksiya komandası yaxşı iş ortaya qoyublar. İnanıram ki, yeni transferlərimiz də komandamızı daha da gücləndirəcək.

- Takis Lemonidisin "Sabah"in baş məşqçisi olacağı deyilir. Bu məlumat nə qədər doğrudur? Ümumiyyətlə, baş məşqçi problemi nə vaxt öz həllini tapacaq?
- Yuxarıda dediyim kimi klubumuza kimisə cəlb edərkən onun ad-sanına yox, komandamıza nə dərəcədə fayda verməsində maraqlıyıq. Mətbuatda da hansısa məşqçilərin adının bizimlə hallandırmalarına qadağa qoya bilmərik. Mediada belə hallar həmişə olur. Baş məşqçi təyinatımız yaxın günlərdə reallaşacaq.

- Püşk sizə Avropa Liqasında Sloveniyanın “Çelye” klubunu rəqib etdi. Bu barədə nə deyə bilərsiniz?
- Avrokuboklarda asan rəqib olmur. Burada mübarizə aparan hər bir kollektiv öz çempionatını yüksək pillələrdə başa vurmuş və ya ölkə kubokunu qazanmış komandalardır. Bizi çətin mübarizənin gözlədiyini bilirik.

- Hamı sizdən ən azı Konfrans Liqasının qrup mərhələsinə vəsiqə qazanmağınızı gözləyir. Sizin hədəfiniz nədir?
- Biz məsuliyyətimizi anlayırıq. Bilirik ki, ölkə çempionatından da çətin beynalxalq yarışda mübarizə aparacağıq. Odur ki, turnirə çox ciddi hazırlaşacağıq. Klub olaraq avrokuboklarda mümkün qədər irəli getmək və ölkəmizi ən yaxşı şəkildə təmsil etmək üçün əlimizdən gələni edəcəyik.

MİRZƏ S.

Sport1.az