"Futbola qardaşım və oğlanlarla oynayaraq başlamışam" - MÜSAHİBƏ

Qadınlardan ibarət Azərbaycan millisinin kapitanı Sevinc Cəfərzadə bu gün Litva yığmasına qarşı keçirəcəkləri UEFA Millətlər Liqasının oyunundan əvvəl AFFA-nın mətbuat xidmətinin suallarını cavablandırıb.

Sport1.az xəbər verir ki, Rusiyanın "Krasnodar" klubunun 31 yaşlı hücumçusu futbola gəlişindən, karyerasından danışıb və bugünkü oyunla bağlı fikirlərini bölüşüb:

– Qarşıda milli komandamızı Litva ilə vacib oyun gözləyir. Həmin görüşdən gözləntiləriniz nədir?

– Yeganə gözləntimiz qələbədir. Çünki bizi B Liqasına yalnız qələbə yüksəldə bilər. Meydanda əlimizdən gələni edəcəyik ki, 3 xalı qazana bilək.

– Qrupda birinci yeri tutmaq üçün Litva ilə oyunda mümkün qədər çox qol vurmaq lazımdır. Bu, komandada əlavə təzyiq yaratmayacaq?

– İlk növbədə, qələbəni təmin etməliyik. Daha sonra top fərqini artırmaq üçün mübarizə aparmaq lazımdır ki, mövqeyimizi yaxşılaşdıraq. Düşünmürəm ki, bu, komandaya əlavə təzyiq yaradacaq. Bizim əsas işimiz meydanda sona qədər mübarizə aparmaq və istədiyimiz nəticəyə nail olmaqdır. Amma bunun asan olmayacağını yaxşı bilirik. Buna görə də oyuna maksimum səviyyədə hazırlaşırıq.

– Ümumiyyətlə, millinin UEFA Millətlər Liqasının cari mövsümündəki çıxışını necə qiymətləndirirsiniz?

– Çox yaxşı qiymətləndirirəm. Komandamız bəzi oyunlarda əsas futbolçular olmadan mübarizə aparmalı olsa da, uğurlu nəticələr əldə etdiyimizi düşünürəm. Ancaq işimiz hələ bitməyib, davam etməliyik. Qarşıdakı matçın nə qədər vacib olduğunu hər birimiz yaxşı anlayırıq.

– Kapitan kimi paltardəyişmə otağında komandaya necə motivasiya verirsiniz?

– Bəzən motivasiyanı yalnız paltardəyişmə otağına saxlamıram. Elə hallar olur ki, onları məşqlərdə və ya oyundan əvvəl toplantılarda etməyə çalışıram ki, oyunçularımız maksimum hazır və motivasiyalı olsunlar. Paltardəyişmə otağında da müəyyən söhbətlərimiz olur. Hər görüşün nə qədər önəmli olduğunu komanda olaraq bilirik, ancaq bunu bir daha hər kəsin diqqətinə çatdırıram. Bütün komanda yoldaşlarıma güvənirəm. Hamımızın məqsədi ölkəmizi layiqincə təmsil etməkdir.

– Bir az da özünüzdən danışın: Futbola necə gəlmisiniz və bu idmanla neçə ildir məşğulsunuz?

– Artıq 15 ildir milli komandanın üzvüyəm. Futbola qardaşımla və oğlanlarla birlikdə oynayaraq başlamışam. Qardaşımın və ailəmin böyük dəstəyi sayəsində bu gün bu səviyyəyə qədər gəlib çatmışam.

- Uzun müddətdir milliyə dəvət alırsınız. Sizin üçün ən yaddaqalan oyun hansı olub?

– Milli komandanın hər oyunu mənim üçün vacib və önəmlidir. Çünki hər qarşılaşmada tökdüyüm alın tərim var. Milli formanı geyinərək keçirdiyim hər matç mənim üçün əzizdir – fərq etməz, qələbə qazandıq, ya da məğlub olduq. Millidə çıxış etmək hər bir futbolçu üçün qürurdur.

– Bəs ilk oyununuzu xatırlayırsınız?

– Əlbəttə, 2010-cu ildə - 16 yaşımda əsas heyətin üzvü kimi Uels millisinə qarşı oynamışdım.

– Karyeranızda vurduğunuz ən vacib qol hansıdır?

– Mənim üçün vacib olmayan qol yoxdur. Vurduğum hər qol əziz və önəmlidir. Çünki hər qolun, hər məhsuldar ötürmənin öz gözəlliyi və özəlliyi var.

– Komandanın hər hansı oyunöncəsi ritualları varmı?

– Qarşılaşmadan əvvəl milli musiqilərimizə və vətənpərvər ruhda mahnılara qulaq asırıq. Xüsusi bir ritualımız olmasa da, hər kəsin etdiyi dua var. Həmişə Allaha şükr edib, dualarımızı edirik. Bunun bizim üçün çox vacib və əhəmiyyətli olduğunu düşünürəm.

– Futbola başlamaq istəyən gənc qızlara nə tövsiyə edərdiniz?

– Öz üzərilərində çox çalışsınlar. Kənardan deyilən mənfi fikirlərə qulaq asmasınlar. Qulaq asdıqları insanlar yalnız valideynləri olsun. Təhsillərinə də önəm versinlər və heç vaxt qarşılarına qoyduqları məqsədlərdən imtina etməsinlər. Daim mübariz, əzmkar olsunlar. Uğura gedən yol heç vaxt asan olmur. Ona görə də dözümlü olsunlar. Çəkdikləri əziyyətin qarşılığını bir gün ən gözəl şəkildə alacaqlar.