"Cəbrayıl"ın qolkiperi mövsümün onlar üçün çətin keçdiyini düşünür - MÜSAHİBƏ

"Cəbrayıl"ın qapıçısı Ümid Cəfərovun Sport1.az-a müsahibəsi...

- I Liqanın son turunda “Zaqatala” üzərində əzmkar qələbə qazandınız. Qarşılaşma ilə bağlı nə deyə bilərsən?
- Şükürlər olsun ki, qələbə qazanan tərəf biz olduq. Qazandığımız 3 xal bizim üçün çox vacib idi. Çətin oyun oldu. Məşqçimizin bizə verdiyi tapşırıqları düzgün yerinə yetirərək nəticədə qalib gəlməyi bacardıq.

- Görüşün ən yaxşılarından biri də sən idin. Öz performansınla bağlı nə deyə bilərsən?
- Hər oyun komandam üçün əlimdən gələnin ən yaxşısını etməyə çalışıram. Öz üzərimdə çox işləyirəm. Növbəti mövsüm yenə bu tempdə davam edərək ən yaxşılardan olacağıma əminəm.

- Artıq mövsümü bu oyunla başa vurdunuz. Bu il sizin adınıza necə keçdi?
- Enişlər, çıxışlar çox olsa da, I Liqada qalmaq uğrunda mübarizəni uğurla başa vurduq. Düşünürəm ki, mövsüm bizim adımıza çətin keçsə də, əziyyətimizin bəhrəsini gördük.

- Gələn mövsümdəki planlarınız nədir?
- Daha yuxarı pillələr uğrunda mübarizə aparmağı düşünürük. Yalnız bu məqsəd uğrunda döyüşüb, əlimizdən gələni etməyə çalışacağıq.

EMİN ZEYNALLI

Sport1.az