"Bizim son oyunlarımızdakı hakimliklər həddən artıq aşağı səviyyədədir" - Samir Abasov

Misli Premyer Liqasının 28-ci turunda "Neftçi" "Araz-Naxçıvan"la heç-heçə edib - 1:1.

Sport1.az xəbər verir ki, oyundan sonra keçirilən mətbuat konfransında meydan sahiblərinin çalışdırıcısı Samir Abasov iştirak edib.

Mütəxəssis görüş haqda fikirlərini səsləndirdikdən sonra jurnalistlərin suallarını cavablandırıb:

"Psixoloji baxımdan olduğunu düşünmürəm. Bəli, ilk hissədə üstünlük “Neftçi” tərəfdə idi. Soyunub geyinmə otağına gəldikdə də rəqibə epziod verməmələrini və daha diqqətli olmalarını tapşırdım. İkinci hissədə də 2 real qol imkanımız oldu. Sonluq, oyunçunun öz ustalıq səviyyəsiylə bağlıdır. Bir məşqlə futbolçunu ora qədər gətirib çıxara bilərsən, amma üzbəüz qalanda qərar oyunçunundur. Bu gün 4-5 100 faizlik şans yaratmaq yaxşıdır. Amma bu epizodlardan yararlana bilməmək də üzücüdür".

– Oyunun sonlarında hakimlikdən narazı görünürdüz…
– Bəli, həddindən artıq narazı idim. Oyunun gedişatında bir az səbrli olursan. Amma sona doğru bu cür epizodlar üst-üstə gələndə, biz də öz emosiyalarımıza hakim ola bilmirik. Bizim son oyunlarımızdakı hakimliklər həddən artıq aşağı səviyyədədir. Heç xoşumuza gəlmədi. Tempi öldürmək və bir tərəfli qərarlar bizi narahat etməyə başlayıb.

– Qarşıda “Sabah”la kubok matçı var. Bu oyuna baxıb, kubok matçında nəyi dəyişəcəksiz?
"Bu gün öz oyunumuza köklənməliyik. Bizim işimiz məşqçi olaraq bu qədər qol epizodlarının yaradılmasına kömək etməkdir. Çalışacayıq ki, ilk oyun öz meydançamızdadır və düzgün şəkildə çıxış edək. İtkilərimiz var. Həmin oyuna qədər 3 nəfəri də itirə bilərik. Təki komandam sağlam olsun və bu oyunlara da son şans kimi çıxaq".[

– Milliyə yollanmış “Neftçi” futbolçuları düşərgəyə hansı motivasiya ilə qayıtdılar?
– Əlbəttə, uduzmaq hər bir insanı üzür. Bu gün psixolojidən də əlavə millidən gələnlərin fiziki durumu yaxşı deyildi. Xüsusən də Rza Cəfərovun zədəli qayıtması yaxşı olmadı. Hətta millinin son matçında onu zədəli-zədəli oynatmışdılar. Bilmirəm niyə. Bunları araşdırırıq. Əsas qapıçımızdır. Belə məqamlar bizi narahat edir. Digər oyunçularla danışdıqda isə düşünürəm ki, onları bir az boş vermək lazımdır ki, düşmüş olduqları vəziyyətdən çıxa bilsinlər. Ağadadaş gəncdir, bir az elə şeyləri dərk etmir. Amma Elvin Camalov doğrudan da psixoloji olaraq yaxşı deyildi. Çünki o, həddindən artıq xarakterli futbolçudur və məğlubiyyəti həzm edə bilmir.

– “Sabah”la oyundan öncə pozetiv məqam var?
– Oyun qabağı heç bir neqativliyimiz yoxdur. Əlbəttə, bu gün xal itirdiyimizə görə üzülürük. Amma “Sabah”la matça kökləndikdə bunları unutmalıyıq. İndividual baxımdan futbolçular barədə danışmaq istəmirəm. Sadəcə Sambunu itirmək bizim üçün həddən artıq pisdir. Hələ də anlamıram ki, onun niyə “qırmızı” aldığını bilmirəm. Dəfələrlə epizoda baxmışam. “Nottinqem Forest” – “Mançester Siti” matçında bir epizod var ki, bundan da pisdir. Amma referi heç “sarı” da vermir. Məqsəd nə idi, niyə belə etdilər bilmədim. Hələ mənim üçün qaranlıq qalıb. Amma biz lazımsız yerə oyunçumuzu itirdik.

Sport1.az