AFFA-da struktur dəyişikliyi - 2 departament birləşdirildi

Uzun müddətdir ki, AFFA-da səssizlik idi.

Düzdür, baş katib Cahangir Fərəcullayev və vitse-prezident Sərxan Hacıyev Premyer Liqa matçlarını stadiondan izləyirlər. Lakin onlar da media nümayəndələrindən qaçdıqları üçün federasiyanın fəaliyyəti ilə bağlı hansısa dəqiq informasiyaları əldə edə bilmirik.

Lakin redaksiyamıza qurumla bağlı yeni informasiya daxil olub. Sport1.az-ın məlumatına görə, AFFA-da yeni departament fəaliyyətə başlayıb. Klubların Lisenziyalaşdırılması və Qeydiyyat-Statistika Departamentləri ləğv olunub. Onların əvəzinə yeni qurum təsis olunub. Yeni şöbə Klubların Lisenziyalaşdırılması və Qeydiyyat Departamenti adlanacaq. Quruma Seymur Səlimli rəhbərlik edəcək. Adı çəkilən şəxs avqustun 1-dən bu postda fəaliyyətə başlayıb.

Qeyd edək ki, bir müddət öncə UEFA-nın danışılmış oyunlarla bağlı Azərbaycan üzrə nümayəndəsi kimi fəaliyyət göstərən Seymur Səlimli vəzifəsini tərk etmişdi. Onun əvəzinə Naib Əsədov təyin olunmuşdu. Seymur Səlimli isə Qeydiyyat və Statistika Departamentinin rəisi idi. AFFA-nın Klubların Lisenziyalaşdırılması Departamentinin direktoru isə Elçin Məmmədov idi. O, bir müddət öncə öz istəyi ilə vəzifəsindən istefa vermişdi. Adı çəkilən şəxs daha sonra baş katib Cahangir Fərəcullayevin müavini təyin edilmişdi.

İLKİN SULTANLI

Sport1.az