Qarğa və tülkü təmsili, AFFA-nın nağılları - KÖŞƏ

Qarğa bir ağacın budağında oturub pizza yeyirdi.

Uzaqdan bunu görən tülkünün ağzı sulandı. Yaxına gəlib dedi:
- Bəh-bəh, nə gözəl qanadların, ayaqların, dimdiyin var! Bir oxusaydın, sənin o gözəl avazını eşidərək feyziyab olardım...
Qarğa dimdiyindəki pizzanı qoltuğuna vurdu və dedi:
- Sən ki, o vaxt məni aldadıb pendirimi aparmışdın. Onda ibtidai sinifdə oxuyurdum, indi isə 10-cu sinifdəyəm.
Tülkü dedi:
- Həəəə, elə buna görə qanadlarının tükü tökülüb?
Qarğa qanadlarını açdı ki, baxsın, elə bu vaxt pizza aşağı düşdü.Tülkü göydən onu qamarlayıb gülə-gülə dedi:
- Mən sənin pendirini aparanda tələbə idim, indi isə rəhbər şəxslərdən biriyəm...

İndi düşünürsünüz ki, istilər İlkinə təsir edir. Bu təmsilin AFFA-ya, futbola nə dəxli var? Yuxarıda yazılanlar elə futbol federasiyası ilə əlaqədardır. Gəlin, izah edim…

Milli komanda Latviyada olarkən baş katib Cahangir Fərəcullayev açıqlaması ilə aləmi qatdı bir-birinə. Federasiyada yeni təyinatın olacağını, həmin şəxsin tezliklə işə başlayacağını bildirdi. Sonradan mediada belə bir xəbər yayıldı:

“AFFA-nın İnformasiya Texnologiyaları və Rəqəmsallaşdırma Departamentinin rəhbəri vəzifəsinə Rahim Balakişiyev təyin olunub”.

Əldə etdiyim məlumata görə, adı çəkilən şəxs artıq 2 aya yaxın müddətdir ki, federasiyada fəaliyyətə başlayıb. Amma onun təyinatı ilə bağlı hansısa bir rəsmi informasiya yoxdur. Həəə, başa düşdüm. Yəqin AFFA rəsmi qurum olduğu üçün Rahim Balakişiyev burada sınaq müddəti keçir. Ona görə də təyinatı açıqlanmır. Departamentə rəhbər təyin olunsun, ona da sınaq müddəti verilsin. Qəribədir.

Keçək ikinci məsələyə! 22 iyulda mediada belə bir xəbər yayıldı:

“AFFA Hakimlər Departamentinin rəhbəri Ömər Paşayevə müavin gətirilib. Bir müddət millət vəkili Nigar Arpadarainin yardımçısı olan Bəhruz Teymurov indi tamamilə fərqli sahədə söz sahibi olacaq".

Bu məsələni də araşdırdım. Aydın oldu ki, AFFA rəhbərliyi ötən mövsüm hakimlərin təyinatlarından narazı olublar. Bu səbəbdən də Bəhruz Teymurovu bu vəzifəyə layiq bilirlər. Amma həmin təyinatı da açıqlamırlar. Bax, bu məsələdə AFFA-nın tərəfindəyəm. Allah var! Bəhruz Teymurova sınaq müddəti lazımdır da! Adamın hakimlikdən, futboldan heç bir anlayışı yoxdur. Xahiş-minnətlə bura təyin olunub. Heç nədən xəbəri olmadan ictimaiyyətə təqdim eləmək də düzgün deyil də…

Həəə, əzizlərim. Bu da təmsilmizin izahı. Yeni AFFA rəhbərliyi gələndə nağıllar danışdı. Başımızı aldatdı. Sonra Cahangir Fərəcullayev gəldi. Baş katib kimi fəaliyyətə başlayanda elmə məlum olan, amma anlaşılmayan cümlələr işlətdi. Dəstək olmağımızı istədilər. Gözlədik. Zaman verdik. Amma səbrimiz tükəndi.

Niyə bu dəfə Sərxan Hacıyev haqda heç nə yazmadım? O, artıq olub rəhbər şəxs!

İLKİN SULTANLI

Sport1.az