Cahangir Fərəcullayevin yeni kəşfi - IP həllər mütəxəssisi - KÖŞƏ

Dünən AFFA-nın baş katibi Cahangir Fərəcullayev jurnalistlərə müsahibə verib.

Qurum rəsmisinə belə bir sual ünvanlanıb:

"Sualım İnkişaf Strategiyası ilə bağlı olacaq. Son aylarda bir qədər sakitlikdir. Halbuki, konfransda çıxış edərkən bildirmişdiniz ki, sabahdan islahatlara başlanılacaq. Strategiya ilə bağlı işlər nə yerdədir?"

Cavab öz unikallığı ilə göz oxşayır:

"Yaxşı sualdır. Belə deyim, sakitlik deyil. Daxildə işlər gedir. Kadrlarla bağlı işlərdən başlayıb texniki yöndə islahatlar görülür. Məsələn, son həftələrdə strategiya ilə bağlı qrup yaradılıb. Artıq iki nəfər işləyir. Strategiyaya uyğun rəqəmsal siyasətlə, İP həllərlə bağlı yeni əməkdaşımız işə başlayıb. Deməyim odur ki, kənardan sakitlik kimi görünə bilər, amma işlər gedir. Güman edirəm ki, bunun nəticələrini yaxın zamanlardan etibarən hamı görməyə başlayacaq".

Əvvəla, 2 nəfərlik qrup olmur. Bu, hər yerdə belədir. Elə sözdə işiniz olan futboldan götürək. Nə vaxtsa hansısa turnirin qrupunda 2 komandanın mübarizə apardığını görmüsünüz? Necə olur ki, strategiya ilə bağlı yaradılan qrupda 2 nəfər fəaliyyət göstərir. Elə bu açıqlama işə necə "peşəkar" yanaşdığınızın sübutudur.

İşin komediya hissəsinə keçək:

"Strategiyaya uyğun rəqəmsal siyasətlə, İP həllərlə bağlı yeni əməkdaşımız işə başlayıb".

Necə? Oxuduğum və ya eşitdiyim doğrudur? Yeni əməkdaşınız nə iş görəcək? Heç bilirsiniz İP nə deməkdir? Nə danışdığınızdan xəbəriniz var?

Bilməyənlər üçün izah edim. İP - Internet Protocol" (İnternet Protokolu) sözlərinin qısaltmasıdır. IP ünvanı, internet şəbəkəsinə qoşulmuş hər bir cihazın unikal ədədi bir ünvandır. Bu, o ünvandır ki, bir cihazın şəbəkədə başqa cihazlarla əlaqə qurması üçün istifadə olunur.

İnkişaf Strategiyasının İP həllərlə nə əlaqəsi? Məşhur kinoda deyildiyi kimi, axı sən danışdığını biz qanmırıq...

Yəqin ki, Rövşən Nəcəfin yaratdığı ekosistem kimi baş katibin işə götürdüyü İP həllər mütəxəssi futbolumuzun inkişafına "təkan" verəcək.

Neçə vaxtdır ki, Cahangir Fərəcullayevin ictimaiyyət önünə çıxmamasından, strategiya ilə bağlı açıqlamalar verməməsindən şikayətlənirdim. Hörmətli baş katib. Yaxşı ki, siz çox danışmırsınız. Düz edirsiniz. Çünki nəsə deyəndə elmə bəlli olmayan terminlərlə aləmi bir-birinə qatırsınız...

İLKİN SULTANLI

Sport1.az