AFFA-nın xeylağı - KÖŞƏ

Bizim bölgənin insanlarının istifadə etdiyi bir söz var: "xeylaq".

İki mənada işlədilir. Birincisi çoxluq deməkdir. Xeylinin canlı dildə işlənən formasıdır. Məsələn, anam tez-tez deyir:

"O gün nəsə yazmışdın. Xeylaq adam da layk qoymuşdu. Qorxmursan, a bala?"

Xeylağın nəfər mənası da var. Bizim bölgənin adamları tez-tez deyirlər: "Qız xeylağı hoppanıb-düşməz". "Kişi xeylağı çox gülməz". "Gəlin xeylağı ağır olar" və s.

Bu sözü çox bəyənirəm. Həm təkdə, həm də cəmdə işlənməsi adama ləzzət edir.

Aprelin 11-də xeylaq adam AFFA-ya toplaşmışdı. Qurumun hesabat konfransı keçirilirdi. Baş katib Cahangir Fərəcullayev xeylaq problemlərdən danışdı, görüləcək işləri sadaladı, saz çaldı, dastan söylədi. Hamı alqış tutdu.

İcraçı vitse-prezident Sərxan Hacıyev oyunların manipulyasiyasından danışdı, günahkarların cəzalanacağını bildirdi. Bu istiqamətdə ciddi addımların atılacağını dedi. Sakit danışsa da, göz qorxutdu!

Bu hadisədən 3 həftədən çox vaxt keçib. Amma adıçəkilən şəxslərin gördüyü işlərdən bir xəbər yoxdur. Deyəsən, AFFA-nın Hesabat Konfransında deyilənlər, sadalanan problemlər bir külək idi əsdi, keçdi.

Ya da ki, iş görürlər bizim xəbərimiz yoxdur. Yox, ola bilməz! AFFA-da iş görülsəydi, bunları bəh-bəhlə camaata təqdim edəcək xeylaq adam var. Demək ki, heç nə yoxdur. Ona görə də AFFA-nın bir xeylağı da ortalığa çıxıb hesabat vermir...

Sport1.az