Azərbaycanlı iş adamı 4 milyon avroya Türkiyədə klub aldı - İDDİA

Türkiyə I Liqasının yeni üzvü "Serik Belediyyespor"un səhmləri satılıb.

Sport1.az xəbər verir ki, məlumatı "Ajansspor" nəşri yayıb. Klubun hissələrinin 50 faizinə azərbaycanlı iş adamı sahib çıxıb.

Adı açıqlanmayan həmyerlimizin bunun üçün 4 milyon avro ödəyəcəyi bildirilib. O, əvvəlcə "Antalyaspor"a müraciət etsə də, "qırmızı-ağlar"ın səhmlərinin paylanılması səbəbindən anlaşma reallaşmayıb.

Nəticədə iş adamı bölgənin digər təmsilçisi "Serik Bələdiyyəspor"a üz tutub. Tərəflər arasında iki həftə davam edən danışıqlar prosesində son addım iyunun 17-də atılıb.

Azərbaycanlı iş adamı klubu yenidən qurmağa başlayacaq. O, baş məşqçi Mehmet Altıparmakın istefaya göndərilməsindən sonra əvvəllər Rusiya Premyer Liqası komandalarından birinə rəhbərlik etmiş mütəxəssisi gətirəcək.

Sport1.az