Premyer Liqa klubu afrikalı müdafiəçi ilə maraqlanır - ÖZƏL

"Sabah" heyətini daha bir futbolçu ilə gücləndirə bilər.

Sport1.az-a daxil olan məlumata görə, Masazır təmsilçisi İsveçrənin “Yuverdon” klubunda çıxış edən Məhəmməd Ticani ilə maraqlanır.

Benin millisinin üzvü olan 28 yaşlı mərkəz müdafiəçisi kluba təklif olunub. Hazırda tərəflər arasında danışıqlar davam edir.

1.90 metr boya malik olan Məhəmməd Ticani 2023-cü ilin yayında Çexiyanın “Viktoriya" (Plzen) klubundan “Yuverdon"ə icarəyə verilmişdi. İsveçrə təmsilçisi bu yay onun transfer hüququnu alaraq müqaviləni 2027-ci ilə qədər uzadıb.

Peşəkar karyerası ərzində Ticani bir çox Avropa klublarında çıxış edib. O, “Rayo Valekano B” (İspaniya), “MFK Vışkov”, “Yihlava”, “Slaviya Praqa”, “Slovan Liberets”, “Teplice”, “Viktoriya" (Plzen), “Zbrojovka Brno” (hamısı Çexiya) və “Yuverdon" (İsveçrə) komandalarının formasını geyinib.

Qeyd edək ki, karyerası ərzində 174 oyun keçirən futbolçunun hesabında 6 qolu da var. “Transfermarkt”dakı dəyəri 300 min avro olaraq göstərilir.

NİHAT KƏRİMLİ

Sport1.az