“Şahdağ Qusar”la bağlı vacib açıqlama

“Şahdağ Qusar” Futbol Klubunun gələcək fəaliyyəti ilə bağlı son günlər ictimaiyyətdə yaranan suallara Futbolun İnkişaf Fondu (FİF) aydınlıq gətirib.

Sport1.az xəbər verir ki, fondun icraçı direktoru Tural Piriyev klubun fəaliyyəti ilə bağlı açıqlama verib.

O bildirib ki, hazırda “Şahdağ Qusar”-da təhvil-təslim prosesi yekunlaşmaq üzrədir və klub fəaliyyətini davam etdirəcək:

“Şahdağ yaşayacaq. Bu, təkcə bir klubun deyil, bir bölgənin futbol ənənəsinin davamı deməkdir. Klubun son illərdə irəliləməsində böyük rolu olan və əsas sponsor qismində çıxış edən “Azenco”ya təşəkkür edirik.”

FİF rəhbəri əlavə edib ki, klubun maliyyə sabitliyinin qorunması üçün yeni investorlarla danışıqlar aparılır. 2025/2026 mövsümündə klubun büdcəsi dövlət proqramı çərçivəsində planlaşdırılıb və əlavə maliyyə mənbələrinin yaradılması istiqamətində işlər görülür.

“Futbolun İnkişaf Fondu olaraq, dayanıqlı klub modeli yaratmaq üçün çalışırıq. “Şahdağ Qusar” bu baxımdan vacib regional mərkəzlərdən biridir. Hazırda bir neçə yerli sahibkarla və şirkətlərlə danışıqlar aparılır. Məqsəd klubun yalnız mövsümə deyil, uzunmüddətli perspektivə hazırlanmasıdır,” – deyə Piriyev qeyd edib.

Yaxın günlərdə klubun yeni idarəetmə strukturu, texniki heyəti və hazırlıq planı ilə bağlı rəsmi məlumatın ictimaiyyətlə bölüşüləcəyi gözlənilir. Həmçinin, azarkeş birliyinin gücləndirilməsi məqsədilə kiçik ianə layihəsinə start veriləcək.

Tural Piriyev açıqlamasının sonunda klubun azarkeşlərinə səbirli olmalarını və yeni dövrə dəstək göstərmələrini xahiş edib.

Sport1.az