Bu klub iddialı layihə ilə Premyer Liqaya gəlir - FOTOLAR

I Liqada 23 turdan sonra 44 xalla 2-ci pillədə qərarlaşan "İmişli" Premyer Liqaya vəsiqəni təmin edib.

Sport1.az xəbər verir ki, bölgə təmsilçisi artıq lisenziya məsələlərini həll edib. Klub tələb olunan 60 prosesin hamısını həyata keçirib.

Əldə etdiyimiz məlumata görə, AFFA "İmişli"yə lisenziya verəcək.

İndi əsas sual doğuran məqam komandanın ev oyunlarını harada keçirəcəyidir. Artıq bu məsələ də öz həllini tapıb. "Çəhrayı pələnglər" 2025/26 mövsümündə qarşılaşmalarını "ASCO Arena"da keçirəcək.

Bəs, "İmişli" yeni "futbol ili"də bütövlüklə Bakıda məskunlaşacaq?

Bu məsələ ilə bağlı redaksiyamıza informasiya daxil olub. Rəhbərlik AFFA İcraiyyə Komitəsinin Premyer Liqaya yüksələcək kollektivlərin maddi-texniki bazasının, infrastrukrurunun yaxşılaşdırması üçün verdiyi 1 illik möhlət imtiyazından maksimum yararlanmaq istəyir.

Artıq "İmişli"nin görəcəyi işlər də bəllidir. Arena əsaslı şəkildə təmir olunacaq. Oturacaqlar yenilənəcək. Suvarma sistemi dəyişdiriləcək. Elektron tablo və işıqlandırma sistemi quraşdırılacaq. Heydər Əliyev adına İmişli şəhər stadionunun ərazisində yeni baza tikiləcək. Burada standartlara cavab verən 6 təbii örtüklü meydança salınacaq. Yerli uşaqların futbolun sirrlərini öyrənməsi üçün akademiya tikiləcək. Komanda üzvlərinin yerləşməsi üçün bina, rəqiblərin, AFFA nümayəndələrinin, hakimlərin qalması üçün otel inşa ediləcək.

Artıq layihənin proyekti hazırdır. I Liqada mövsüm başa çatan kimi işlərə start veriləcək. Layihənin 7-8 ayda həyata keçirilməsi nəzərdə tutulub.

"İmişli"nin yeni bazasının baş planını diqqətinizə çatdırırıq: