Yenilənən "Sumqayıt" xaos hökm sürən "Kəpəz"ə qarşı - AFİŞA

Misli Premyer Liqasında I turun həyacanı davam edir.

Bu gün "Sumqayıt" doğma meydanda "Kəpəz"i qəbul edəcək. Cütün favoriti "Sumqayıt"dır. Saşa İliç amili bu oyunda böyük rol oynayacaq. Serbiyalı mütəxəssis Azərbaycandakı ilk oyununda qələbə qazanmaq niyyətindədir.

"Kimyaçılar" yay "transfer pəncərəsi"ndə heyətini istənilən səviyyədə gücləndirə bildi. Komandanın hazırda 1 və ya 2 mərkəz müdafiəçisinə ehtiyacı var. Yenilənən "Sumqayıt"ın hədəfi avrokuboklara vəsiqə qazanmaqdır.

"Kəpəz"də sponsor problemi həll olundu. Stadionları da yanvarda hazır olacaq. Amma Gəncə təmsilçisi hələ klub olaraq formalaşmayıb. "Sarı-göylər"də qalmaqallı hadisələr səngimir. 4 ay ərzində kluba 2 rəhbər təyin olunub. Gəncə təmsilçisində xaos hökm sürür. "Dağlılar" heyətini o qədər də səviyyəli oyunçularla gücləndirmədi. Adil Şükürovun komandası bu mövsüm Premyer Liqada qalmağa oynayacaq.

Maraqlıdır ki, “Sumqayıt” və “Kəpəz” indiyədək 32 dəfə üz-üzə gəlib. Bu görüşlərin 13-də “kimyaçılar”, 8-də isə gəncəlilər qələbə qazanıb. 11 oyun heç-heçə ilə yekunlaşıb. Top fərqində də "Sumqayıt" öndədir - 40:30.

Qeyd edək ki, son 4 matçda qonaq olan komanda qol vurmayıb. “Sumqayıt” ardıcıl iki dəfə evdə qalib gəlib.


Misli Premyer Liqası
17 avqust
I dövrə, 1-ci tur
“Sumqayıt” – “Kəpəz”
Hakimlər: Fərid Hacıyev, Rəhman İmami, Gülnurə Əkbərzadə, Vüqar Həsənli
VAR hakim: Rauf Cabarov
VAR hakimi köməkçisi: Rahil Ramazanov
Hakim-inspektor: Anar Salmanov
AFFA nümayəndəsi: Elçin Mehtiyev
Sumqayıt. Mehdi Hüseynzadə adına Sumqayıt şəhər stadionu. Saat 20:30.

XƏLİL İBADLI

Sport1.az