"Qələbə seriyamız davam etməlidir" - Bahadur Həziyev

I Liqanın III turunda "Səbail" doğma divarlar arasında "Şahdağ Qusar"ı qəbul etdi.

Sport1.az xəbər verir ki, görüş meydan sahiblərinin qələbəsi ilə başa çatdı. "Səbail"in futbolçusu Bahadur Həziyevin saytımıza müsahibə verdi...

— Çempionatda ardıcıl 3-cü qələbənizi qazandınız. Matçla bağlı fikirlərin maraqlıdır...

— Gərgin oyun olacağını bilirdik. Qarşılaşmaya yaxşı hazırlaşmışdıq. Qusarlılar debütant olsalar da, çox istəkli və asan təslim olmayan komandadır. Görüş yüksək tempdə keçdi. Düşünürəm ki, daha böyük hesabla qalib gələ bilərdik. Sadəcə, yaratdığımız imkanlardan yalnız ikisini dəyərləndirə bildik. Rəqib də pis çıxış etmədi.

— "Şahdağ"la oyunda qapıçı mövqeyindən başqa demək olar ki, hər yerdə oynadın. Bunun səbəbi nə idi?

— Əsas mövqeyim insayddır. Sadəcə, baş məşqçimizin göstərişi əsasında həm müdafiəyə, həm hücuma dəstək verirdim. Dala-qabağa işləməyim tapşırılmışdı.

— Hər iki qolunuzu müdafiəçilər vurdu. Hücumçularınız bu qədər təsirsizdir?

— Xeyr, hücum xəttimizdə kifayət qədər keyfiyyətli futbolçularımız var. Sadəcə, biz məşqlərdə standart vəziyyətlər üzərində çox çalışırıq. Məşqçilər korpusumuz hər bir futbolçudan duran toplarda aktivlik tələb edir. Müdafiəçilərimizin qol vurması da həmin əziyyətin nəticəsidir.

— Öz performansın haqqında nə deyə bilərsən?

— Hələ üzərimdə çox işləməliyəm. Daha yaxşı formaya düşmək üçün əlimdən gələni edəcəm.

— Komanda 3 oyuna maksimum nəticə əldə edib. Səncə, bu, digər komandaların sizə qarşı daha yüksək motivasiya ilə çıxmasına səbəb olmayacaq?

— Təbii ki, uğurlu seriyamız davam etdikcə, rəqiblər də bizə qarşı daha prinsipial oynayacaqlar. Hər kəs bizi büdrətmək istəyəcək. Bu isə məsuliyyətimizi artırır və daha çox çalışmalı oluruq. Həm qollar vurmaq, həm də qələbə qazanmaq getdikcə çətinləşir.

— Bu tempi qorumaq çətin olmayacaq?

— Əlbəttə, işimiz çətindir. Amma əgər çempionluq hədəfi qoymuşuqsa, bütün gücümüzü səfərbər etməliyik. Ancaq bu yolla qızıl medallara sahib ola bilərik.

Mirzə S.

Sport1.az