Məğlubiyyət yoxdur, növbəti mərhələ kimlərə qismət olacaq? - TƏHLİL

Avrokubokların II təsnifat mərhələsində Azərbaycan təmsilçiləri ardıcıl uğurlu nəticələr qazanaraq həm ölkə reytinqinə dəyərli xallar əlavə etdilər, həm də növbəti mərhələyə yüksəlmək uğrunda ciddi iddialarını ortaya qoydular.

“Qarabağ”, “Sabah”, “Araz-Naxçıvan” və “Zirə”nin bu həftəki çıxışları ümumilikdə 0.875 əmsal qazandırdı ki, bu da maksimuma yaxın nəticədir. Heç bir komandamız məğlub olmadı, "Zirə"nin qalib gəlməsinə isə dirək icazə vermədi.

Düşünürəm ki, “Qarabağ” növbəti mərhələni səfərdə təmin etdi. Ağdam təmsilçisi İrlandiyada “Şelburn” üzərində 3:0 hesablı inamlı qələbə qazandı. Qurban Qurbanovun komandası avrokubok təcrübəsini və səviyyəsini nümayiş etdirdi. Matçın müəyyən bir qismində "Şelburn" "köhlən atlar"dan nisbətən üstün oldu. Hətta qola yaxınlaşsalar da, Nəriman topu xəttdən çıxartdı. Təəssüfləndirən məqam isə zədələrlə bağlıdır. Matçdan öncə Yankoviç, oyunun gedişində isə Bolt və Andradenin problemləri ciddi olsa, son çempion növbəti mərhələdə çətinlik çəkəcək.

“Sabah” Moldova səfərində “Petrokub” üzərində 2:0 hesabı ilə qələbə qazanaraq həm oyunun gedişinə, həm də nəticəyə nəzarət etdi. Bu matçda komandalar arasında ciddi fərq hiss olunurdu. Dambrauskasın kollektivi xüsusilə ikinci hissədə daha yaxşı çıxış etdi. Düşünürəm ki, hadisələri qabaqlayıb "Sabah"ı növbəti mərhələyə keçməsi münasibəti ilə təbrik edə bilərik.

Məni ən çox təccübləndirən komandamız isə Naxçıvan təmsilçisi oldu. “Araz-Naxçıvan” tarixi qələbə qazandı. Geri düşdükləri matçda 2:1 qalib gələ bildilər. "Aris"in zəngin tarixə, yaxşı futbolçulara malik olduğunu bilirik, amma Elmar Baxşıyevin komandası rəqibin adından çəkinmədi və çox yaxşı təsir bağışladı. Oyunun sonlarına doğru geri düşən Yunanıstan klubu hesabı bərabərləşdirmək üçün böyük qüvvə ilə hücuma çıxırdı. Naxçıvanlılar bir neçə epizodda rəqibdən topu alaraq əks-hücuma keçdilər və yunanları azlıqda yaxaladılar. Təssüflər olsun ki, real qol vəziyyətlərini yaxşı dəyərləndirə bilmədilər. Keytanın qeyri-dəqiqliyini xüsusi qeyd etmək olar. Düşünürəm ki, ev sahiblərinin "7" nömrəsi üçün bu epizodda qolu vurmamaq daha çətin iş idi. Elmar Baxşıyevin komandası oyun nizam-intizamını pozmasa, növbəti mərhələyə çıxa bilər. Çünki yunanlar var qüvvələri ilə irəli atılacaqlar. Belə olan halda yaxşı müdafiə olunmaq və keyfiyyətli əks-hücumlar qurmaq lazım olacaq. Təmsilçimiz bu detalları yerinə yetirə bilsə, növbəti mərhələnin qapılarını aralayacaq.

“Zirə” doğma meydanda Xorvatiyanın “Hayduk” klubu ilə 1:1 hesablı heç-heçə etdi. Əslində, Rəşad Sadıqovun komandası xüsusilə birinci hissədə dominant və istəkli oyun sərgilədi. Pressinq, strukturlaşmış hücumlar və kompakt müdafiə “Hayduk”un oyun planını alt-üst etdi. Ancaq fasilədən sonra rəqib toparlandı və oyunda tarazlıq yarandı. Görüşün sonlarında Rövlan Muradovun uzaqdan baxımlı zərbəsi dirəyə tuş gəldi. Qol olsaydı, "Azərbaycan klublarından avrokuboklarda maksimum nəticə" başlıqlı yazı yaza bilərdik. Komandalarımız arasında ən çətin iş "Zirə"nin üzərindədir. Çünki, "Hayduk" səfəri çox ağır olacaq. "Neftçi Arena"da qonaq komandanın tribunası bunun xəbərçisi idi. Bu cütün 2-ci matçında bir az fərqlə Xorvatiya təmsilçisini üstün görürəm.

Bu mərhələdə Azərbaycan klubları 3 qələbə və 1 heç-heçə ilə 0.875 UEFA reytinq xalı topladı. Bu, son illərdə eyni mərhələ üçün əldə olunan ən yaxşı nəticələrdən biridir. Belə davam edərsə, UEFA reytinqində daha irəlilərə gedə bilərik. Gözləyək, görək, nə olur?!

NİHAT KƏRİMLİ

Sport1.az