"Ən əsası müdafiədə etibarlı oynamalıyıq"

“Ötən mövsümlə müqayisədə bu il çox yaxşı çıxış edirik”.
Sport1.az xəbər verir ki, bunu “Sumqayıt”ın basketbolçusu İsmayıl Əliyev klubun mətbuat xidmətinə açıqlamasında deyib.

O, “Sərhədçi” ilə pley-in mərhələsindəki oyunlar ərəfəsində komandasının şanslarından danışıb. Əliyev əvvəlcə “Sumayıt”ın çıxışını dəyərləndirib: "Fikrimcə, növbəti mövsüm daha xoş təsir bağışlayacağıq. Hamımız üzərimizə düşən vəzifəni yerinə yetiririk. Məncə, pley-ində də belə uğurlu çıxış edəcəyik”.

Vaxtilə “Sərhədçi”də oynayan İsmayıl sabiq komandasını təhlil edib: “Bir vaxtlar “Sərhəçi”nin üzvü olmuşam. Onlar çox yaxşı komandadır. Rəqibi qətiyyən zəif adlandırmaq olmaz. Pley-ində bizi çətin oyunlar gözləyir. “Sərhədçi”ni mübarizədən kənarlaşdırmaq üçün vahid komanda olmalıyıq. Ən əsası müdafiədə etibarlı oynamalıyıq. Mümkün qədər onların məhsuldarlığını aşağı salmalıyıq. Məqsəd pley-offa vəsiqə qazanmaqdır”.

Əliyev klubun azarkeşlərinə də çağırış edib: “Cümə günü azarkeşlərimizi Sumqayıt Olimpiya İdman Kompkeksində gözləyirik. Onlar mövsüm boyunca bizə dəstək veriblər. İstərdim ki, pley-in mərhələsində də yanımızda olsunlar. Azarkeşlərimizin dəstəyi ilə “Sərhədçi”ni məğlub etmək istəyirik”.

Qeyd edək ki, “Sumqayıt” – “Sərhədçi” matçı aprelin 11-də keçiriləcək.

Sport1.az