Rüfət Quliyev: “Zirə” üçün hələ heç nə bitməyib” - AÇIQLAMA

Sabah klublarımız Konfrans Liqasında növbəti oyunlarını keçirəcəklər. Ötən həftə təmsilçilərimiz bu turnirdə uğurlu çıxış etdilər. “Zirə” “Hayduk”la heç-heçə etdi – 1:1. “Araz-Naxçıvan” Bakıda “Aris”ə qalib gəldi – 2:1. “Sabah” səfərdə “Petrokub”u məğlub etdi – 2:0. Bu nəticələrdən sonra hansı klubumuz növbəti mərhələyə adlaya bilər? Cavab matçlarında təmsilçilərimiz nə edə biləcəklər? Suallarımızı Rüfət Quliyevə ünvanladıq.

Mütəxəssis mövzu ilə bağlı Sport1.az-a açıqlamasında bunları söylədi:

“Konfrans Liqasında hər 3 klubumuz ilk görüşlərində yaxşı mübarizə apardılar. Düzdür, “Zirə” qələbə hesabını qoruya bilmədi. Buna rəğmən, oyun planında pis çıxış etmədi. “Zirə” üçün hələ heç nə bitməyib. Qəsəbə təmsilçisi səfərdə əzmkarlıq sərgiləsə və müdafiədə boşluqlar verməsə, sevinən tərəf ola bilər.
“Araz-Naxçıvan” ilk matçda güclü “Aris”ə futbol dərsi keçdi. Naxçıvanlılar sərgilədikləri oyunla xoş sözlərə layiqdilər. Elmar Baxşıyevin komandası Yunanıstana hesabda və psixoloji cəhətdən üstün yollansalar da, Saloniki təmsilçisi doğma divarlar arasında revanş üçün son saniyəyə kimi döyüşəcək. İnanıram ki, “Araz-Naxçıvan” bu təzyiqə dözəcək və mərhələ adlayan tərəf olacaq.
“Sabah” Moldovada “Petrokub”nu iki top fərqiylə məğlub etməklə 50 faiz işinin öhdəsindən gəlib. Buna rəğmən, “bayquşlar” arxayınlaşmayaraq ikinci dueldə də qələbə üçün mübarizə aparacaqlar. Hər 3 klubumuza uğurlar arzu edirəm”.

MİRZƏ S.

Sport1.az