"Çox istəyərdim ki, indiki futbolçularımız da bizim nəsil kimi döyüşsünlər” - Sabiq bombardir

Premyer Liqada 2024/25 mövsümü başa çatdı. Cari "futbol ili"ndə bombardirlik yarışında azərbaycanlı futbolçular "dişsizliyi" ilə seçildi.

"Snayperlər"in mübarizəsində Leandro Andrade 15 qolla lider oldu. Siyahıda cəmi iki yerli futbolçu - Nəriman Axundzadə və Filip Ozobiç yer aldı ki, onlardan birincisi 9, digəri isə 8 dəfə rəqib qapılarına yol tapa bildi.

Görəsən, yerli futbolçular nə üçün çempionat matçlarında qol vura bilmirlər. Onlar niyə geridə qalan mövsümdə fəallıq göstərə bilmədilər? Suallarımızı veteran futbolçu Paşa Əliyevə ünvanladıq. 2000/01 mövsümünün bombardiri mövzu ilə bağlı Sport1.az-a açıqlamasında bunları söylədi:

“Bu mövsüm yerlilər üçün yaxşı keçmədi. Bombardirlik yarışında azərbaycanlı futbolçunun qalib olmaması məni çox üzür. Onsuz da Premyer Liqanın ən sərrast futbolçusu olan Leandro Andrade də cəmi 15 qol vurmağı bacardı. Mahir Emreli güclülər dəstəsində çıxış etsəydi, Ramil Şeydayev, Musa Qurbanlı və digər yerli forvardlarımızı formada olsaydılar, bombardirlik yarışında daha yaxşı rəqabət görə bilər və azərbaycanlı futbolçuların çempionatın ən sərrastı olmasına şahidlik edərdik. Amma bu, baş vermədi. Yerli hücumçularımızın "dişsizliyi" hamımızı məyus edir. Bizim vaxtımızda indikilərə yaradılan şərait, infrastruktur-baza yox idi. Məşq etmək üçün belə əlavə formamız yox idi. Öz üzərimizdə maksimum çalışır, qollar vurmağa cəhd göstrir və yığmaya cəlb olunmaq üçün döyüşürdük. Nazim Əliyev, Müşfiq Hüseynov, Musa Qurbanov, Samir Ələkbərov, Rövşən Əhmədov, Qurban Qurbanov və digər futbolçularımızın adlarını çəkərdim. Onların hər biri meydanda can qoyurdu. Çox istəyərdim ki, indiki futbolçularımız da bizim nəsil kimi döyüşsünlər”.

MİRZƏ S.