AFFA seçim qarşısında: 6, yoxsa 7?

Yaxın günlərdə AFFA İcraiyyə Komitəsinin növbəti iclası keçiriləcək.

Sport1.az xəbər verir ki, toplantıda ölkə futbolu ilə bağlı vacib qərarlar qəbul olunacaq. Müzakirə olunacaq əsas məsələlər I Liqa ilə bağlıdır.

Bildiyimiz kimi, yeni mövsümdən bu turnirdə 10 komanda iştirak etməlidir. Federasiya bu məsələdən narahatdır. Çünki UEFA bayrağı altında çıxış edən bir çox ölkələrdə aşağı liqada əsas çempionatla müqayisədə ya eyni sayda, ya da daha çox komanda iştirak edir. Bizdə isə qərar dəyişilməsə, əksi olacaq.

AFFA rəhbərliyinin bu məsələ ilə bağlı 2 seçimi var: ya klubların sayını artırmaq, ya da əvəzedicilərin I Liqada iştirak etməsinə şərait yaratmaq.

İlk versiyanın olması daha realdır. Çünki bəzi Premyer Liqada iştirakçıları Əvəzedicilər Liqasının ləğv olunmasını istəyir. Çünki ikinci komandanın saxlanılması əlavə maliyyə yükü deməkdir. Bu səbəbdən də II Liqada lisenziya almış bəzi komandalar I Liqaya gətirilə bilər. AFFA-nın əsas istəyi ən azı 12 kollektivdən ibarət çempionatın təşkil edilməsidir.

Qurum daha bir dəyişiklik edə bilər. Söhbət I Liqadakı legioner limitindən gedir. Hazırda turnirdə "8 yerli + 3 legioner" formatından istifadə olunur. Gələn mövsüm Premyer Liqanın 11-cisi ilə I Liqanın 2-cisi arasında pley-off matçları keçiriləcək. Əsas çempionatda legioner limiti olmayacaq. Bu da komandalar arasında güc balansına ciddi təsir edəcək. Bu səbəbdən də AFFA I Liqada legioner limitinin dəyişdirilməsini istəyir. Federasiya "5 yerli + 6 legioner" sistemindən yanadır. Klublar isə "4+7"nin tətbiq olunmasını istəyir.

AFFA İcraiyyə Komitəsinin növbəti iclasında bu barədə yekun qərarın verilməsi gözlənilir.

Sport1.az