Qurban Qurbanov: "Daha diqqətli olmağa çalışacağıq"

"Qarabağ" komandası İrlandiya təmsilçisi "Şelburn" üzərindəki 3:0 hesablı qələbəni yaddan çıxararaq, Bakıdakı cavab matçına daha ciddi hazırlaşacaq.

Sport1.az xəbər verir ki, bunu Ağdam təmsilçisinin baş məşqçisi Qurban Qurbanov UEFA Çempionlar Liqasının II təsnifat mərhələsində "Şelburn"a qarşı oyundan sonra keçirilən mətbuat konfransında deyib. O, mətbuat konfransında jurnalistlərin suallarını cavablandırıb.

- Cütün taleyi həll olundu?

- Qətiyyən yox. Tam yanlış fikirdir. Bu rəqib məğlub olmağı xoşlamır. "Şelburn" meydanda nə etdiyini bilən komandadır. Ona görə də Bakıdakı matçda burdakından daha diqqətli olmalıyıq.

- Rəqibin təzyiqi zamanı oyun üslubunu dəyişməyi planlaşdırırsınız?

- Xeyr. Rəqib təzyiq göstərirsə, oynamaq asan olmur. Səfərdə oynayırıq və belə termin yoxdur ki, rəqib təzyiq göstərəndə qeyri-adi nəsə edək. Əksinə, rəqibə uyğun oyunumuzu qururuq. Sadəcə ilk oyunumuzdur. İnanıram ki, qarşıdakı matçlarda daha yaxşı olacağıq. Bəlkə də rəqib bizə uyğun olmayan sürətlə, üslubda oynayırdı. Biz meydançada yerləşənə kimi 1-2 ötürmə ilə hücuma çıxa bilirdilər. Müdafiəçilərimiz bərk durdular, rəqibin hücumçularına imkan vermədilər. Bu oyunda həddindən artıq riskə getməli deyildik.

- Daha əvvəl İrlandiyada “Dandalk”la qarşılaşmışdınız. Keçmişdəki oyundan hansısa dərs çıxarmışdınız?

- Futbol gündən-günə dəyişir. Geriyə baxsaq, gələcəkdə uduza bilərik. Ona görə də bu gün üçün hazırlaşırıq. Rəqibə uyğun hazırlaşmışdıq. Amma hər iki matçda – həm bu, həm də “Dandalk”la görüşdə gərgin dəqiqələr oldu. Bu da normaldır. İndi hamı düzgün hücum qurmağı, müdafiə olunmağı bacarır. Komandalar keyfiyyətlərini artırırlar. Belə oyunlar bizimçün əlavə təcrübə olur.

Qeyd edək ki, "Şelburn" - "Qarabağ" görüşü qonaqların 3:0 hesablı qələbəsi ilə yekunlaşıb.

Sport1.az