"Avrokubokları təmin etdiyimizi deməzdim" - Rəşad Sadıqov

Misli Premyer Liqasının 29-cu turunda "Qarabağ" "Zirə"yə qalib gəldi - 1:0.

Sport1.az xəbər verir ki, oyundan sonra keçirilən mətbuat konfransında qonaqların çalışdırıcısı Rəşad Sadıqov mətbuat konfransında iştirak etdi.

Mütəxəssis görüş haqda fikirlərini bildirdikdən sonra jurnalistlərin suallarını cavablandırdı:

"Rəqib komandanı qələbə münasibətilə təbrik edirəm. Bizim üçün ağır oyundur. "Qarabağ"a qarşı oyunlar asan keçmir. Rəqib bu gün ən güclü heyəti ilə çıxış edirdi. İşimizi daha da çətinləşdirirdi. Futbolçularım yaxşı mübarizə apardılar. Matç rəqibin üstünlüyü ilə keçirdi. Bunu oyundan əvvəl də bilirdik. Etibarlı müdafiə olunaraq, daha çox əks-hücumlara bel bağlayırdıq. Futbolçularımdan razı qaldım. Beşinci oyundur ki, "Qarabağ" standart vəziyyətdən bizə 9-cu qol vurur. Bunun qarşısını ala bilmirik. Futbolçularımı təbrik edirəm. İnanırdılar, mübarizə aparırdılar. Çox yaxın idik bərabərliyə. Bu gün buradan məğlub hissi ilə ayrılmıram. Bərabərliyə layiq idik. Qarşıdakı matçlara baxacağıq, var gücümüzlə vacib görüşlərə hazırlaşacağıq".

- Penaltini qaçıran futbolçunu bağışlamaq olar?
- Niyə olmur? Özüm də qaçırmışam, usta futbolçular da qaçırıb. Başqa epizodlar da var idi ki, qaçırdıq. Oyunumuz bir penalti ilə bağlı deyil idi. "Qarabağ" böyük təzyiqlə oynayır. Buradan bir xalla ayrılmaq olardı. Futbolçularımı məğlub olmamış kimi görürəm.

- Ötən mövsüm də avrkuboklarda gördük ki, penaltini vurmaqda çətinlik çəkən oyunçular var. Xüsusi məşqlər edirsiniz?
- Penaltinin xüsusi məşqi yoxdur. Oyun olsun və təzyiq zamanı vursun. Məşqlərdə 10 penaltini vururdum. Amma oyun zamanı böyük həyəcan olurdu. Qismət də yaxşı zərbə vurdu. Son dəqiqələr idi, bəlkə təzyiqi var idi. Qismət komandada kritik və uğurlu penaltilər yerinə yetirib. Penalti üzərində çox dayanmaq istəmirəm.

- Bu sezon Yusuf Lavalı görə biləcəyik?
- Müalicəsi gedir. Ola bilsin ki, son turlara yetişsin. Necə hazırlacaq, onu zaman göstərəcək. Əməliyyat edilib, bərpası gedir.

- "Zirə" yaranandan bu günə qədər ən yaxşı durumdadır. Son matçlarda stabil oynayırsız. Bu stabilliyi sona qədər saxlamaq olacaq?
- Zaman göstərəcək. Stabil oynamamışıq. 1-ci dövrənin sonu, 2-ci dövrənin əvvəlində uğursuzluq var idi. Çempionatımızda qələbə qazanmaq çətindir. Bundan sonrakı matçlar vacibdir. Hər oyunda güc sərf etməliyik. Mənim üçün vacib olan oyunun stabilliyidir. Gələcəklə bağlı danışmaq çətindir.

- Gedişat onu göstərir ki, avrokuboklara gedəcəksiz. Bu heyət yetərlidir, yoxsa əlavələr olmalıdır?
- Bir şey bitməmiş, rəsmiləşməmiş o mövzuları danışmıram. Doğru olmazdı. Özümüzə və rəqiblərə qarşı da. Avrokubokları təmin etdiyimizi deməzdim. Evdə güclü rəqiblərlə oynayacağıq. Heç bilmirəm avrokubokların birinci oyunu nə vaxtdır. Ona da baxmamışam. Allah nəsib edər düşərik, sonra bu haqda danışarıq.

Sport1.az