Rüfət Abdullazadə legioner həyatı yaşamaq istəyir - MÜSAHİBƏ

“Səbail”in futbolçusu Rüfət Abdullazadənin Sport1.az–a müsahibəsi…

- Premyer Liqanı tərk etməyiniz əvvəlcədən təsdiqlənmişdi. Niyə belə oldu?
- Mövsüm ağır, gərgin keçdi. Nə qədər çalışsaq da, nəticələrimizi yaxşılaşdıra bilmədik və komandamızı elitada saxlaya bilmədik. Amma sonuncu turda meydana qələbə üçün çıxaraq qapını möhkəm çırpmaq istəyirdik ki, bunu da bacarmadıq. Deməyə sözüm yoxdur. İnanıram ki, “Səbail” I Liqada daha yaxşı mübarizə apararaq yenidən güclülər dəstəsinə qayıdacaq. Komandaya uğurlar arzu edirəm.

-Bir kapitan olaraq “dənizçilər”in I Liqaya yuvarlanmasında əsas günahkarlar kimdədir?
- Hesab edirəm ki, özüm daxil bütün futbolçuların bu işdə günahları var. Mövsümün əvvəlində heç də yaxşı oyunlar keçirə bilmədik. Bunun nəticəsində qızıla bərabər xallar itirdik. Ondan sonra da toparlanmaqda çətinlik çəkdik.

- Gələcək karyeranı harada davam etdirəcəksən?
- Hələlik istirahət edirəm. Amma danışıqlar gedir. Məqsədim ölkə xaricinə yollanaraq legioner həyatı yaşamaqdır. Düşünürəm ki, artıq özümü fərqli çempionatlarda sınayım və yaxşı tərəfdən göstərim.

- Yerli klublarımızdan təkliflərin yoxdur?
- Var. Amma başlıca məqsədim legioner həyatı yaşamaqdır.

- Ölkə xaricindən təkliflər qonşu, yoxsa uzaq dövlətlərdəndir?
- Bu barədə hazırda nəsə demək istəmirəm. Zamanla hər şey aydın olacaq.

- Qarşıdan yığmamızın iki yoldaşlıq görüşləri gəlir...
- Hər ikisi bizə tanış və güclü rəqiblərdir. Millimizə uğurlar arzu edirəm. İnanıram ki, seçmə mərhələ ərəfəsində yaxşı hazırlıq keçib, yoldaşlıq görüşlərində özlərini müsbət tərəfdən göstərərək uğurlu nəticələr əldə edəcəklər.

MİRZƏ S

Sport1.az