UFC-nin Azərbaycana nə kimi faydası olacaq? - MMA Federasiyasının prezidenti AÇIQLADI

Azərbaycan ilk dəfə məşhur UFC (Ultimate Fighting Championship) turnirinə ev sahibliyi edəcək.

Sport1.az xəbər verir ki, bu tarixi hadisə iyunun 21-də Bakı Kristal Zalında baş tutacaq. Döyüş gecəsi Gənclər və İdman Nazirliyi və Bakı Şəhər Halqası Əməliyyat Şirkətinin əməkdaşlığı ilə həyata keçəcək.

UFC-nin prezidenti və baş icraçı direktoru Dana Uayt ilə Azərbaycan Respublikasının gənclər və idman naziri Fərid Qayıbov əməkdaşlıq haqqında razılaşma imzalayıb. İmzalanma mərasimi Mayamidə baş tutub.

Tədbirin əsas döyüşündə yarım ağır çəkidə keçmiş UFC çempionu, hazırda 4-cü yerdəki namizəd Camal Hill 7-ci pillədəki Xəlil Raundtri JR ilə qarşılaşacaq.

UFC-nin Azərbaycana nə kimi faydası olacaq? Bu idman növü ölkəmizdə daha da inkişaf edə bilər? Turnirdən gözləntilərimiz nədir? Suallarımızı MMA Federasiyasının Prezidenti Azad Əsgərova ünvanladıq. Qurum rəsmisi saytımıza açıqlamasında bunları söylədi:

"Adicə döyüş idmanı üzrə Bakı Birinciliyi keçiriləndə və ya döyüş sənəti ilə bağlı filmlər nümayiş olunanda insanlarda maraq yaranır. Odur ki, UFC-in ölkəmizdə keçirilməsi əlamətdar hadisədir. Turnirə ev sahibliyi etməyimizlə döyüş idmanı növünün daha da populyarlaşacağını düşünürəm. Ölkəmizə güclü döyüşçülər gəldikcə və beynəlxalq turnirlər keçirildikcə MMA bizdə də inkişaf edəcək. Bundan əlavə, özümüzdə də cəngavərlər yetişəcək".

Sport1.az