Futbol hakimi oyun vaxtı həbs edildi

Braziliyada polis futbol hakimini birbaşa oyunun gedişində həbs edib.

Sport1.az xəbər verir ki, həvəskar futbolçular arasındakı qarşılaşma zamanı saxlanılan 38 yaşlı Ederson Karlos da Silva narkotik alverində şübhəli bilinir.

Polis əməkdaşları onu həbs etməzdən az əvvəl referi sarı vərəqə göstərmək üçün bir futbolçuya yaxınlaşıb. O, yan xəttə kürəyini çevirən kimi, polis əməkdaşları meydana daxil olaraq onu hamının gözü qarşısında qandallayaraq meydandan aparıb.

Xatırladaq ki, həbs əməliyyatı bölgədə fəaliyyət göstərən narkotik alverçiləri şəbəkəsinə qarşı aparılan istintaq çərçivəsində həyata keçirilib. Bu şəbəkə 2024-cü ilin noyabrında San-Pauluda 450 kq kokain daşıyan yük maşınının saxlanılmasından sonra hüquq-mühafizə orqanlarının diqqətini cəlb edib.

Sport1.az