Karyerasını 19 yaşında başa vurdu

“Roma”nın əfsanəvi kapitanı və 2006-cı il dünya çempionu Françesko Tottinin oğlu Kristian Totti 19 yaşında peşəkar futbolçu karyerasını başa vurmaq qərarına gəlib.

Sport1.az xəbər verir ki, bu barədə “La Nuova Sardegna” məlumat yayıb.

Mənbənin məlumatına görə, futbolçunun bu qərarının səbəbi güclü psixoloji təzyiqlər və daim məşhur atası ilə müqayisə edilməsi olub.

“Bəli, karyeramı bitirirəm, artıq qərarımı vermişəm” – deyə Kristian Totti bildirib.

Kristian karyerasını başa vursa da, futboldan uzaqlaşmayacaq. O, Françesko Totti tərəfindən yaradılmış futbol məktəbində skaut (istedad axtaran) kimi fəaliyyətə başlayacaq və gənc istedadların axtarışı ilə məşğul olacaq.

Kristian mərkəz yarımmüdafiəçisi mövqeyində çıxış edib, əvvəlcə “Roma” akademiyasında oynayıb, daha sonra “Frozinone” və “Rayo Valyekano”nun gənclər komandalarında, həmçinin İtaliyanın D Seriyasına daxil olan “Avezzano” və “Olbia” klublarında forma geyinib.

Sport1.az