AFFA "Turan Tovuz"dan fakt istəyir - BƏYANAT

Misli Premyer Liqasının 24-cü turunun "Şamaxı" - "Turan Tovuz" matçından öncə qonaqlar rəsmi hesablar vasitəsi ilə bəyanat yaymışdı.

Sport1.az xəbər verir ki, Qərb təmsilçisi görüşdən qabaq hakim idarəçiliyinin şübhəli olacağını iddia etmişdi.

Məsələ ilə bağlı AFFA yeni bəyanat yaydı:

"Ölkə ərazisində qarlı hava şəraiti ilə əlaqədar oyunların keçiriləcəyi stadionlarda müəyyən çətinliklər yaranıb. Misli Premyer Liqasının 24-cü turunun “Şamaxı” – “Turan Tovuz” oyununun keçirildiyi Şamaxı şəhərində güclü qar yağmasına baxmayaraq, stadion qardan təmizlənib və oyuna hazır vəziyyətə gətirilib. Azərbaycan Premyer Liqasının Əsasnaməsində oyun canlı yayımlanmasa və ya VAR sistemi tətbiq olumasa, matçın keçirilməməsi ilə bağlı heç bir şərt yoxdur. Belə ki, meydançanın durumu imkan verdiyi halda, komandalar, hakimlər, hakim-inspektor, AFFA nümayəndəsi, təcili-tibbi yardım maşını stadionda olduğu təqdirdə, həmçinin təhlükəsizliklə bağlı hər hansı problem olmasa, oyun baş tutmalıdır.

“Turan Tovuz”un “Şamaxı” ilə oyundan əvvəlki bəyanatı AFFA-nı məyus edir. Artıq birinci dəfə deyil ki, “Turan Tovuz” hakimlərlə bağlı xoşagəlməz fikirlər səsləndirir. Əgər “Turan Tovuz”un bununla bağlı hər hansı faktları və sübutları varsa, klubdan xahiş olunur ki, ən qısa müddətdə AFFA-ya təqdim olunsun. Əks halda məsələyə AFFA İntizam Komitəsi tərəfindən baxılacaqdır və müvafiq tədbirlər görüləcəkdir.

Sport1.az