"Premyer Liqada qalmaq üçün maksimum nəticə qazanmağa çalışacağıq"
Misli Premyer Liqasının 29-cu turu çərçivəsində "Qəbələ" - "Araz-Naxçıvan"la sülhə razılaşdı - 1:1.
Sport1.az xəbər verir ki, qarşılaşmadan sonra ev sahibinin müdafiəçisi İsaak Amoah jurnalistlərin suallarını cavablandırdı.
–Oyun haqqında düşüncələriniz?
–Düşünürəm ki, bu qarşılaşmadan həm müsbət, həm də mənfi məqamlar götürə bilərik. Yaxşı oynadıq, rəqibdən üstün idik, qol şanslarımız oldu. Təəssüf ki, istədiyimiz xalları qazana bilmədik. Amma qarşıdakı oyuna hazırlaşmaq və işləməyə davam etmək hazırda ən vacib məsələdir.
– Bu oyunda qalib gələ bilməməyinizin əsas səbəbi nə oldu?
– Problem qol şanslarından istifadə edə bilməməyimiz idi. Bunu ancaq hücumçuların üzərinə atmaq düzgün olmaz. "Araz-Naxçıvan" müdafiədə çox yaxşı oynadı və bizə çətinlik yaratdı. Sadəcə, daha çox işləməli və belə hallarda daha dəqiq olmalıyıq.
– Bu oyunda qalib gəlsəydiniz, turnir cədvəlində “Kəpəz”i qabaqlamaq şansınız olacaqdı...
– Xeyr, bunu məyusedici nəticə kimi qəbul etmirəm. Əlbəttə, qalib gəlib, onları keçmək istəyirdik. Amma bu, futboldur. Məğlub olsaydıq, daha çox üzülərdik. Hələ qarşıda çox oyun var və şanslarımız qalır. Sadəcə, ehtiyac duyduğumuz üç xalı qazana bilmədik. Komanda olaraq yaxşı oynadıq, birlikdə mübarizə apardıq və bu, növbəti oyunlar üçün bizə motivasiya verməlidir.
– Növbəti tur səfərdə “Zirə” ilə qarşılaşacaqsınız. Rəqib avrokuboklar uğrunda mübarizə aparır və bu, çətin oyun olacaq. Gözləntiləriniz nədir?
–Bəli, ağır görüş olacaq. “Zirə” bu mövsüm çox yaxşı çıxış edir və keyfiyyətli heyətə malikdir. Amma biz də ora maksimum nəticə qazanmaq üçün gedəcəyik. Heç bir rəqibə hörmətsizlik etmirik, amma özümüzə də inanırıq. Bu, futbol oyunudur və hər iki komanda ən yaxşısını ortaya qoyacaq. Ümid edirəm ki, istədiyimiz nəticəni əldə edə biləcəyik.
– Ötən mövsümlə bağlı bir sual vermək istərdik. “Qəbələ” keçən il I Liqada çox məhsuldar idi. Demək olar ki, hər oyun qol vururdu. Bu mövsüm komanda Premyer Liqada fərqlənməkdə çətinlik çəkir. Bunu necə izah edə bilərsən?
– Çempionatın səviyyəsi çox şeyi müəyyən edir. Aşağı liqada daha çox qol vura bilərsiniz, amma Premyer Liqada təcrübəli və keyfiyyətli oyunçularla qarşılaşırsınız. Onlar oyunu daha yaxşı oxuyurlar. Bundan əlavə, komanda heyəti də dəyişib. Mövsümün əvvəlində fərqli liqalardan gələn oyunçuların uyğunlaşması çətin oldu. Qış fasiləsində heyət gücləndirildi, amma hələ də adaptasiya prosesi davam edir. Üstəlik, komandada çoxlu zədələr var və bu da mövsümümüzə ciddi təsir edir. Qarşıda təxminən dörd oyunumuz qalıb və Premyer Liqada qalmaq üçün maksimum nəticə qazanmağa çalışacağıq.
MƏHƏMMƏD HÜSEYNOV
