Elvin Cəfərquliyevin şəxsi həyatı, yoxsa futbolu? - YAZI

​"Qarabağ"da nizam-intizam həmişə bərk olub. Qurban Qurbanovun tələblərini hamımız bilirik. Amma bəzən verilən qərarlar o qədər qeyri-adi olur ki, adam təəccübünü gizlədə bilmir.

​Elvin məsələsi də belə nümunələrdəndir. "Şamaxı" ilə oyundan sonra gecə klubuna gedən futbolçunu cərimələməyi başa düşdük. Onu əvəzedici heyətə göndərmək də klubun daxili qaydasıdır. Amma oyunçunu satışa çıxarmaq artıq nizam-intizamı keçir.

​Unutmayaq ki, dünyəvi ölkədə yaşayırıq. Bizə futbolçunun şəxsi həyatı yox, meydandakı oyunu maraqlıdır. Nümunəvi komanda ancaq qazandığı nəticələrlə diqqət çəkməlidir.

​Dünya futbolunda oyunçunun şəxsi həyatı o qədər vacib olmur. Uzağa getməyək! Türkiyəli Sergen Yalçın nümunəsi var. Adamın gecə həyatı var idi, amma meydanda işini görürdü. Heç kim onu buna görə hansısa komandadan qovmurdu.

​Elvinin də həm "Qarabağ", həm də milli üçün meydanda can qoyduğu hamıya bəllidir. Onsuz da mövsüm sonu heyət dağılır. Əsas dayaqlar komandadan gedir. Belə bir vaxtda Elvin kimi meydanda can qoyan oyunçunu bəhanə ilə satmaq doğru deyil. Futbolçu robot deyil. Onun meydandan kənardakı azadlığına bu dərəcədə müdaxilə etmək olmaz.

Görəsən, bizə nə lazımdır? Gecə həyatı olmayan, intizamlı, azadlığı əlindən alınan, futbolu pul qazanmaq üçün vasitə kimi görən Elvin Cəfərquliyev? Yoxsa, gecə həyatı olan, içki içən, amma Çempionlar Liqasında ən yaxşı seçilən, qol vuran Elvin Cəfərquliyev?

MƏHƏMMƏD HÜSEYNOV