Millinin baş məşqçisi: “Hədəfimiz hamını qürurlandıracaq komanda formalaşdırmaqdır”

20 yaşadək futbolçulardan ibarət Azərbaycan milli komandası Qəbələdə təlim-məşq toplanışını davam etdirir.

Sport1.az xəbər verir ki, yığmanın baş məşqçisi Ruy Jorje toplanışla bağlı jurnalistlərin suallarını cavablandırıb.

– Toplanış necə keçir?

– Keyfiyyətli məşqlər keçirik. Futbolçulardan istədiyimiz reaksiyanı ala bilirik. Ümumilikdə iki həftəlik hazırlıq prosesindən razıyam.

– Niyə yoxlama oyunu keçirilmədi?

– Futbolçuları daha yaxından tanımaq istəyirdim. İlk yoxlama oyunundan əvvəl səviyyəmizi düzgün qiymətləndirmək üçün belə qərar verdik.

– Milli komanda ilə ilk təəssüratlarınız necədir?

– Futbolçuların yanaşmasından məmnunam. Onlar çox istəklidirlər və bizim oyun fəlsəfəmizə uyğun gəlirlər. Öyrənməyə və inkişaf etməyə açıqdırlar.

– Hansı oyun fəlsəfəsini tətbiq edəcəksiniz?

– Hazırda bunu dəqiq demək çətindir. Təbii ki, hamı hücumameyilli futbol görmək istəyir. Biz də bu istiqamətdə gedəcəyik, amma bunun üçün daha çox keyfiyyət və məşq lazımdır.

– Qarşıdakı toplanışlarda yoxlama oyunları olacaq?

– Bəli, olacaq. Böyük ehtimalla xarici milli komandaya qarşı oynayacağıq.

– Heyəti seçərkən yerli məşqçilərlə məsləhətləşmisiniz?

– Bu yaş qrupunda əvvəl milliyə dəvət olunmuş futbolçulardır. Onların son oyunlarını da izləmişik və seçimləri buna əsasən etmişik.

– Sizdən əvvəl bu komandada tanınmış məşqçilər işləsə də uğur olmayıb. Şansınızı necə görürsünüz?

– Keçmiş barədə danışmaq istəmirəm. Mənim məqsədim futbolçuların səviyyəsini artırmaqdır. Gələcəyə fokuslanmışıq və ölkəni fəxr etdirəcək komanda qurmaq istəyirik. Nəticə də gördüyümüz işin sonu olacaq.

– 2027 U-20 Dünya Çempionatı ilə bağlı fikriniz nədir?

– Ev sahibi kimi iştirak edəcəyik. Digər komandalarla aramızda fərq var, bunu azaltmaq üçün çox işləməliyik.

– Qəbələdəki şərait sizi qane edirmi?

– Bəli, çox razıyam. Bizim üçün ideal şərait yaradılıb. Hər yerdə qonaqpərvərlik hiss olunur. Hamıya təşəkkür edirəm.