Emin Mahmudov: "Hava şəraiti istər-istəməz oyuna təsir edir"

"FIFA Series - 2026" beynəlxalq turnirində Azərbaycan -Sent Lüsiyanı darmadağın etdi - 6:1.

Sport1.az xəbər verir ki, qarşılaşmadan sonra millimizin kapitanı Emin Mahmudov jurnalistlərin suallarını cavablandırdı.

Kapitan oyuna fəal başladıqlarını və erkən qolun komandaya əlavə güvən verdiyini bildirdi:

“Bilirdik ki, daha çox qol vura bilərik. Ona görə də matça fəal başladıq. Məqsədimiz erkən qol vurmaq idi və buna nail olduq. Bu, komandaya daha da güvən verdi. Yekunda da böyükhesablı qələbə qazandıq.”

Mahmudov əvəzetmələrə baxmayaraq, komandanın ikinci hissədə də yaxşı çıxış etdiyini vurğuladı:

“Bizdə yaxşı rəqabət var. İkinci hissədə meydana çıxan futbolçular da özlərini yaxşı tərəfdən göstərdilər.”

O, oyun zamanı hava şəraiti və qazonun durumu ilə bağlı da fikirlərini bölüşdü:

“Düzdür, güclü yağış yağırdı. Belə hava şəraiti istər-istəməz oyuna təsir edir. Bununla belə, qazonun durumu elə də pis deyildi.”

Kapitan milliyə yeni qoşulan futbolçuların adaptasiya prosesinə də toxundu:

“Hamı bir-birini yaxşı tanıyır. Demək olar ki, bütün futbolçular ölkə çempionatında çıxış edir. Ona görə də debütantlar üçün yığmaya qoşulmaq rahatdır.”

Sonda Mahmudov növbəti oyun barədə də danışdı:

“Növbəti matçımız daha çətin olacaq. Çünki Syerra Leone daha ciddi və güclü rəqibdir. Buna baxmayaraq, yenə də uğurlu çıxış etmək istəyirik. Çalışacağıq ki, qarşıdakı matçda da qələbə qazanaq.”

MƏHƏMMƏD HÜSEYNOV