“Zirvəyə doğru – Qazax 2026” turniri başa çatıb

Qazax rayonunun 2026-cı il üçün “İdman Paytaxtı” seçilməsi münasibətilə Azərbaycan Alpinizm Federasiyası tərəfindən, Azərbaycan Respublikasının Gənclər və İdman Nazirliyinin dəstəyi ilə 27–29 may 2026-cı il tarixlərində “Zirvəyə doğru – Qazax 2026” turniri olan gənclər və tələbələrdən ibarət 35 nəfərlik iştirakçı qrupu Qazax rayonunun təbii, tarixi və idman potensialı ilə yaxından tanış olmaq imkanı əldə edib.

Sport1.az xəbər verir ki, layihənin təşkilində Qazax Rayon İcra Hakimiyyəti və Qazax-Tovuz Regional Gənclər və İdman İdarəsi tərəfindən dəstək göstərilib.

Tədbir iştirakçıları Qarasu gölü ərazisində qurulmuş düşərgədə iki gecə keçiriblər. Proqramın ilk günündə qayalıq ərazilərdə dırmanma texnikalarının mənimsənilməsi və təkmilləşdirilməsi məqsədilə praktiki məşğələlər təşkil olunub. Təlimlər zamanı iştirakçılar təhlükəsizlik qaydaları, qayalarda hərəkət texnikaları və əsas dırmanma vərdişləri üzrə bilik və bacarıqlarını artırıblar.

Turnir çərçivəsində həyata keçirilən yürüş proqramı iştirakçıları rayonun mühüm təbii və tarixi məkanları ilə tanış edib. Marşrut Damcılı bulağı, Avey məbədi, Qızılqaya ərazisi və təbii mağaraları əhatə edib. Eyni zamanda iştirakçılar Göyəzən dağı istiqamətində yürüşündə iştirak edərək bölgənin landşaft xüsusiyyətlərini, təbii irsini və turizm imkanlarını yaxından müşahidə ediblər.

Turnirin əsas məqsədi gənclər arasında sağlam həyat tərzinin təşviqi, dağçılıq və ekoturizm mədəniyyətinin təbliği, habelə regionların idman və turizm potensialının tanıdılmasına töhfə vermək olub.

“Zirvəyə doğru – Qazax 2026” turniri iştirakçılar arasında aktiv istirahət və dağçılıq fəaliyyətlərinə marağın artırılması, komanda ruhunun möhkəmləndirilməsi və ölkənin təbii irsinin tanıdılması baxımından mühüm əhəmiyyət daşıyıb.