Premyer Liqada növbəti qalmaqal: İntizam Komitəsi hakimin qərarını dəyişdi - FAKT

Misli Premyer Liqasının 20-ci turunda baş verən iki epizod qərarların tətbiqi baxımından diqqət çəkir.

"İmişli" - "Qarabağ" qarşılaşmasında "köhlən atlar"ın üzvü Kadi Borges qırmızı vərəqə ilə meydandan kənarlaşdırıldı. Hakim protokolunda səbəb açıq şəkildə göstərilib: təcavüzkar davranış. 

İntizam Komitəsinin bu hadisə ilə bağlı qərarına baxaq:

"14 fevral 2026-cı il tarixində Misli Premyer Liqasında XX turun “İmişli” – “Qarabağ” oyununun 72-ci dəqiqəsində “Qarabağ” komandasının 20 nömrəli futbolçusu Kadi Borges ciddi qayda pozuntusuna görə birbaşa qırmızı vərəqə aldığı üçün 2 oyun oyuna buraxılmasın, “Qarabağ” komandası 1000 manat cərimə edilsin (maddə 44.1)".

İndi burada ortaya sual çıxır: Kadinin hərəkəti ciddi qayda pozuntusudur, yoxsa təcavüzkar davranış? Axı Cavid Cəlilov protokolda ikincini qeyd edib. İntizam Komitəsi hərəkətin dərəcəsini niyə azaldıb? Maraq üçün bildirək ki, Hakimlər Komitəsinin sədri Rəhim Həsənov da Premyer Liqanın 21-ci turunu dəyərləndirərkən epizodu təcavüzkar davranış kimi dəyərləndirib.

Keçək digər məsələyə. "Araz-Naxçıvan" - "Sumqayıt" matçının 74-cü dəqiqəsində Elçin Məsiyev Aleksandr Ramalinqomu birbaşa qırmızı vərəqə ilə cəzalandıraraq meydandan qovdu.

İntizam Komitəsi bu hadisə ilə bağlı aşağıdakı qərarı verib:

"15 fevral 2026-cı il tarixində Misli Premyer Liqasında XX turun “Araz-Naxçıvan” – “Sumqayıt” oyununun 74-cü dəqiqəsində “Sumqayıt” komandasının 9 nömrəli futbolçusu Aleksandr Ramalinqom təcavüzkar davranışa görə birbaşa qırmızı vərəqə aldığı üçün 3 oyun oyuna buraxılmasın, “Sumqayıt” komandası 3000 manat cərimə edilsin (maddə 45.1)".

İki fərqli oyun, eyni qayda pozuntusu amma cəzalar tamamilə fərqli. Bu, Azərbaycan futbolunda ədalət anlayışına dair ciddi suallar doğurur.

İntizam Komitəsi epizodların ağırlıq dərəcəsinə görə fərqləndirmə aparıbsa, bu ictimaiyyətə izah olunmalıdır. Əks halda suallar yaranır:

İntizam Komitəsi "Qarabağ"dan qorxur? Çempionluq mübarizəsinin gedişinə təsir etməmək üçün hansısa güzəştlər edilir? Eyni maddə üzrə verilən qərarların fərqli olması bu şübhələri daha da gücləndirir. Səbəb başqa amillərlə bağlıdırsa, o zaman bunun açıq və rəsmi şəkildə izahı verilməlidir.

Azərbaycan futbolunda qaydalar kağız üzərində deyil, praktikada da hamı üçün eyni işləməlidir. Ədalətin görünməsi ən az tətbiqi qədər vacibdir. Oxşar hallarda fərqli qərarlar davamlı hal alarsa, bu, təkcə klublar arasında deyil, azarkeşlər arasında da inam probleminə səbəb olacaq. Liqanın imici zədələnəcək.

MƏHƏMMƏD HÜSEYNOV