Qismət Alıyev: “Hər xal qızıl dəyərindədir” – MÜSAHİBƏ

Misli Premyer Liqasının 27-ci turu çərçivəsində "Sabah" - "Zirə" ilə meydandan sülh ilə ayrıldı - 2:2.

Qarşılaşmadan sonra qonaq komandanın kapitanı Qismət Alıyev Sport1.az-a müsahibə verdi.

Həmin müsahibəni təqdim edirik:

– Oyunun əhəmiyyətini necə qiymətləndirirsiniz?

– Oyunun nə qədər önəmli olduğunu yaxşı bilirdik. “Şamaxı” ilə oyunda son saniyədə buraxdığımız qol bizi çox məyus etmişdi. Buna baxmayaraq, bu qarşılaşmaya çox yaxşı hazırlaşmışdıq.

– Bu nəticəni itirilmiş 2 xal kimi qiymətləndirirsiniz, yoxsa qazanılmış 1 xal kimi?

– Hazırkı vəziyyətdə çempionatda hər xal çox önəmlidir. Rəqibimiz həqiqətən güclü komandadır və çempionluq uğrunda mübarizə aparır. Belə komandaya qarşı 1 xal qazanmaq normal nəticədir. Mən bunu daha çox qazanılmış xal kimi qiymətləndirirəm.

– Növbəti rəqibiniz “Neftçi”dir. Artıq 3 oyundur bu komandaya məğlub olmursunuz. Bu seriyanı davam etdirmək və xal fərqini artırmaq mümkündür?

– Bəli, artıq sabahdan etibarən “Neftçi” ilə oyuna köklənəcəyik. Onlar ikinci dövrədən sonra çox yaxşı formaya düşüblər. Düşünürəm ki, bu ilin ən maraqlı oyunlarından biri olacaq. Avrokubok zonası uğrunda mübarizə baxımından çox vacib qarşılaşmadır. Oyuna maksimum hazırlaşıb vacib qələbə qazanmağa çalışacağıq.

– Mövsümün sonuna yaxınlaşdıqca təzyiq artır. Kapitan kimi bu vəziyyəti idarə etmək çətindir?

– Açığı, bu cür gərgin sonluqları komandamız üçün ilk dəfə yaşamırıq. Keçən mövsümdə də son tura qədər avrokuboklar uğrunda mübarizə aparmışıq. Bu baxımdan kifayət qədər təcrübəmiz var. Belə oyunlardan üzüağ çıxmağı bacarmışıq. Bu mövsümdə də Avropa Liqası və ya Konfrans Liqasına vəsiqə qazanmaq üçün sonadək mübarizə aparacağıq.

MƏHƏMMƏD HÜSEYNOV