Joze Mourinyo "Tottenhem"i sərt tənqid etdi

“Tottenhem”in sabiq baş məşqçisi Joze Mourinyo London təmsilçisinin idarə edilməsindəki problemlərdən danışıb.

Sport1.az xəbər verir ki, portuqaliyalı mütəxəssis sosial media hesabında klub rəhbərliyini sərt tənqid edib:

​“Tottenhem”dən nə gözləyirsiniz? Finala çıxan məşqçiləri, hətta Avropa kuboklarını qazananları da işdən çıxarırlar. Onlar heç vaxt əsl böyük klubun mentalitetinə sahib olmayıb. Klub daha çox qalib maskası arxasında gizlənmiş uğursuzlar kimi görünür.

​Məşqçiləri daim dəyişdirib birdən-birə sabitliyin yaranacağını gözləmək olmaz. Tarixin ən vacib matçından bir neçə gün əvvəl məşqçini işdən çıxarıb sonra onun xələflərinin uğursuzluqlarına təəccüblənmək olar? Bir məqamda artıq söhbət məşqçilərdən deyil, zəhərli mədəniyyətdən və şübhəli idarəetmə qərarlarından gedir. Xarakter olmadan istedad heç nə demək deyil. “Tottenhem”də isə, heç biri yoxdur”.

​Qeyd edək ki, portuqaliyalı məşqçi 5 il öncə “Mançester Siti” ilə Liqa Kuboku finalından bir neçə gün əvvəl “Tottenhem”dən qovulmuşdu. Mourinyonun qovulmasından sonra “Tottenhem” finalda 1-0 hesabı ilə uduzmuşdu.

​Klub hazırda İngiltərə Premyer Liqasında 30 xalla autsayderlər sırasında yer alıb.