Eren Aydın: “Avrokubok üçün mübarizəni davam etdirəcəyik”
“Bu cür oyunlarda məğlub olmamaq da vacibdir”.
Bu sözləri Sport1.az saytına açıqlamasında “qartallar”ın hücumçusu Eren Aydın Misli Premyer Liqasının 27-ci turu çərçivəsində “Sabah”a qarşı 2:2 hesablı heç-heçədən sonra dedi.
Futbolçu əvvəlcə qarşılaşma ilə bağlı fikirlərini bölüşdü:
“Matça yaxşı hazırlaşmışdıq. 5-li müdafiə ilə başladıq və düşünürəm ki, müdafiədə yaxşı təsir bağışladıq. Erkən qol buraxsaq da, tez toparlana bildik. Yaxşı reaksiya verərək hesabda önə keçdik və ilk hissəni istədiyimiz kimi başa vurduq. İkinci hissədə yenə tez qol buraxdıq, amma sonda məğlub olmadıq. Bu gün qazandığımız 1 xal da bizim üçün dəyərlidir.”
O, növbəti turda “Neftçi”yə qarşı keçiriləcək vacib oyun barədə də danışdı:
“Neftçi ilə çox önəmli oyunumuz var. Bu, Avropa yolunda həlledici qarşılaşmalardan biridir. Eyni zamanda 4-cü yer uğrunda mübarizə baxımından da böyük əhəmiyyət daşıyır. Bu oyunda qalib gələrək yolumuza davam etmək istəyirik. Komandamızın və baş məşqçimizin Avroliqa xəyalı var və bunu reallaşdırmaq üçün əlimizdən gələni edəcəyik.”
Aydın fərdi performansını da dəyərləndirdi:
“Özüm üçün və komandam üçün lazım olanı etdiyimi düşünürəm. Müdafiədə də faydalı olmağa çalışdım. Şükür ki, üzərimə düşən vəzifəni yerinə yetirdim və qol da vurdum. Amma bununla kifayətlənmək istəmirəm, daha çox qol və assistlə komandama töhfə vermək istəyirəm.”
MƏHƏMMƏD HÜSEYNOV
