Ayxan Abbasov üçün bəhanəyə yer yoxdur - YAZI

Azərbaycan millisinin UEFA Millətlər Liqasındakı yeni rəqibləri müəyyənləşib. Püşkün nəticəsinə əsasən yığmamız D Liqasının 2-ci qrupunda Litva və Lixtenşteynlə qarşılaşacaq. Turnir sentyabrda start götürəcək və qrup oyunları noyabrda başa çatacaq. Final mərhələsinin isə 2027-ci ilin iyununda keçirilməsi planlaşdırılır.

C Liqasından enişdən sonra millinin qarşısında duran əsas vəzifə itirilən mövqeni geri qaytarmaqdır. Mövcud rəqiblərin səviyyəsi və heyət potensialı nəzərə alınarsa, qrup birinciliyi real hədəf kimi görünür.

Rəqiblərin gücü nə deyir?

Baltik təmsilçisi qrupun ən bahalı heyətinə sahibdir. Komandanın ümumi transfer dəyəri təxminən 18 milyon avro civarındadır. Heyətin böyük hissəsi ölkə xaricində çıxış edir və legionerlərin sayı yerli çempionatda oynayanları üstələyir.

Litvanın ən dəyərli futbolçusu İtaliya A Seriyasında forma geyinən Gvidas Gineitisdir. O, komandanın aparıcı fiquru sayılır. Bundan başqa, müdafiəçi Edgaras Utkus və qapıçı Edvinas Gertmonas da bazar dəyərinə görə seçilən adlardır. Rəqəmlər göstərir ki, Azərbaycan üçün qrupdakı əsas rəqabət məhz bu komanda ilə olacaq.

Lixtenşteyn isə həm nəticələrinə, həm də statistik göstəricilərinə görə Avropanın ən zəif yığmalarından biri hesab edilir. Komandanın ümumi heyət dəyəri 1 milyon avroya belə çatmır.

Ən bahalı oyunçular arasında qapıçı Justin Ospelt və yarımmüdafiəçi Simon Lüçinger yer alır. Onların transfer qiymətləri 100–150 min avro ətrafındadır. Heyətdə legionerlər olsa da, əksəriyyəti aşağı liqalarda və yarı peşəkar səviyyədə çıxış edir.

Millinin sükanı arxasında olan Ayxan Abbasov üçün bu yarış əsl sınaqdır. Mütəxəssis əvvəlki oyunlarda komandaya müəyyən dinamika qazandıra bildiyini göstərsə də, bunu turnir nəticəsi ilə təsdiqləmək vacibdir. Azərbaycan hazırda Millətlər Liqasının ən aşağı divizionundadır və buradan düşmək mümkün deyil. Deməli, yeganə yol yuxarıdır.

Azərbaycan futbol ictimaiyyəti bu dəfə millidən konkret addım gözləyir. D Liqasından çıxmaq artıq arzu yox, tələbdir. İndi söz Ayxan Abbasovundur.

NİHAT KƏRİMLİ