Yeni AFFA rəhbərliyinin ilk doğru qərarı - YAZI

Sevinirəm. Axır ki!

Rövşən Nəcəf AFFA prezidenti olandan sonra qurum ilk dəfədir ki, doğru qərar verib. Bunu inkişafdan hesab etmək olar. Nədir bu qərar?

Bəxtiyar Musayevə AFFA-da iş verilib. Veteran futbolçu AFFA-nın Texniki departamentin Skautlar şöbəsinə rəis təyin olunub. Xeyirli olsun!

Yəqin ki, AFFA prezidenti başa düşdü ki, "ekosistem", "əkşn plan" kimi sözlərlə baş aldatmaq olmayacaq. Ya da Pakistan Futbol Federasiyasının prezidenti ilə görüşmək iş deyil. Rövşən Nəcəf anladı ki, AFFA-da xaos yaradan yox, işləyən adamlara ehtiyac var.

İndi kimsə deyə bilər ki, Ayxan Abbasovun U-21-ə təyinatını doğru adlandırmaq olar. Mən belə düşünmürəm. Bəli, Abbasov 21 yaşadək milli komandamızın baş məşqçisi olmağa layiqdir. Amma gərək ya “Şamaxı”nı seçərdi, ya da yığmanı. İkisi bir yerdə olan iş deyil! Təki bu fikrimdə yanılım!

Bəxtiyar Musayevi təbrik edirəm. Ümid edirəm ki, yeni vəzifəsində uğurlu olacaq. İşsiz olduğu dönəmdə iddialı açıqlamaları ilə diqqət çəkirdi. Media vasitəsi ilə milli komandanı, AFFA-nı, klublarımızı tənqid edirdi. Ümid edirəm ki, özü səhvləri ilə medianın tənqid atəşinə tuş gəlməyəcək!

İLKİN SULTANLI