“Turan Tovuz”da ara qarışdı: Ehtiram Quliyev həm məşqçini, həm idarəçiləri danladı - ÖZƏL

Misli Premyer Liqasının 3-cü turunda Gəncədə “Kəpəz”ə 0:1 hesabı ilə uduzan “Turan Tovuz”da vəziyyət kritik həddə çatıb.

Sport1.az-a daxil olan məlumata görə, məğlubiyyət klubun İdarə Heyətinin sədri Ehtiram Quliyevi özündən çıxarıb. Qarşılaşma başa çatan kimi paltardəyişmə otağına getmək istəyən rəhbər şəxsin qarşısına Kurban Berdiyevin köməkçisi Andrey Matsyura çıxıb. Ehtiram Quliyev moldovalı mütəxəssisi sərt şəkildə danlayaraq komandanın oyunundan ciddi narazılığını bildirib.

Bununla kifayətlənməyən klub rəhbəri daha sonra digər idarəçilərlə görüşüb. İdarə Heyətinin sədri onlara da sərt iradlarını çatdırıb. “Turan Tovuz”un digər idarəçiləri isə Ehtiram Quliyevə Kurban Berdiyevlə uğurlu nəticə əldə etməyin mümkün olmayacağını deyiblər. Klub rəhbəri baş məşqçi ilə bağlı yekun qərarın “Sumqayıt”la oyuna kimi və ya qarşılaşmadan sonra veriləcəyini söyləyib.

Beləliklə, “Turan Tovuz”da Kurban Berdiyevin taleyi ciddi sual altındadır. Baş məşqçinin komandada qalıb-qalmayacağına Ehtiram Quliyev qərar verəcək.