Mağarada gizlənən ekosistem - KÖŞƏ

Dünən sosial şəbəkələrdə maraqlı məlumat oxudum.

Alimlər Çinin Quanqsi şəhərində nəhəng çuxurda - yerin 197 metr altında gizlənmiş meşə tapıblar. Təbii mağaranın içərisində elmə məlum olmayan 40 metr hündürlüyə sahib ağac növləri yetişir. Burada kəşf olunmamış müxtəlif canlıların yaşadığı düşünülür. Çünki mağaranın özünəməxsus ekosistemi var.

Ekosistem? Nəsə tanış gəldi. Hə, yadıma düşdü! AFFA prezidenti Rövşən Nəcəfin idman mediasına gətirdiyi neologizmdir. Yadınıza gəlirsə, qurum rəhbəri tez-tez özlərinə məxsus ekosistem yaradacaqlarını dilə gətirmişdi.

Amma ortalıqda heç nə yoxdur. Nə inkişaf strategiyasından xəbər var, nə də ekosistemdən. Yəqin ki, Rövşən Nəcəfin tətbiq etmək istədiyi ekosistemin üzərində alimlər çalışır. Ya da bu ekosistem də Çinin Quanqsi şəhərindəki nəhəng çuxurda gizlənib. Görəsən, Rövşən Nəcəfin ekosistemində də elmə məlum olmayan nələrsə var? Çünki nə qədər gözləsək də, ictimaiyyətə bu haqda hansısa məlumat verilmir.

Ekosistemi qoyaq bir kənara! Həmişə mövsüm başa çatanda AFFA rəsmilərindən kimsə media önünə çıxaraq “futbol ili” ilə bağlı müsahibə verirdi. Bu il isə belə olmadı. Nə baş katib Cahangir Fərəcullayevdən, nə vitse-prezident Sərxan Hacıyevdən, nə də rəhbər Rövşən Nəcəfdən səs çıxmadı. Yaxşı, Premyer Liqanın mükafatlandırma mərasimində AFFA-nın prezidenti orada yox idi. Şəxsən düşündüm ki, Azərbaycan Kubokunun finalından sonra adını çəkdiyim şəxslərin brifinqi olacaq. Amma çifayda!
Yadıma gəlir, Sərxan Hacıyev baş katib olanda bütün mükafatlandırmalardan sonra cəsarətlə media qarşısına çıxırdı. Örtülü də olsa, suallara cavab verirdi. Rövşən Nəcəfin ekosistemindən sonra Sərxan bəy də qorxuya düşüb.

Əntiqədir! Halal olsun Rövşən Nəcəfə! Alimlər Quanqsidəki mağarada tapılan meşənin ekosistemindən baş açırlar, araşdırma aparırlar. Amma bizim AFFA-nın ekosistemindən nəsə anlamaq mümkün deyil...

İLKİN SULTANLI