Yeni sistem "Sabah"ı çempionluğa aparır – YAZI

Premyer Liqada mövsümün ən stabil çıxış edən komanda "Sabah"dır. Bakı təmsilçisinin göstəriciləri bunu deməyimizə əsas verir. Paytaxt təmsilçisi hazırda 46 xalla turnir cədvəlinin zirvəsindədir və ən yaxın izləyicisini 4 xal qabaqlayır.

Komanda yalnız çempionatda deyil, Azərbaycan Kubokunda da iddiasını davam etdirir. Ötən mövsüm bu turnirin qalibi olan "Sabah" hazırda yenidən 1/4 final mərhələsindədir və yenə də burada çempionluğu arzulayır.

Masazır təmsilçisinin uğurlu çıxışının arxasında yeni baş məşqçinin işi dayanır. Mövsümün əvvəlindən bəri komandada riskli, amma prinsipial qərarlar qəbul edilir. Əvvəllər əsas heyətin dəyişməz üzvləri olan futbolçular artıq ilk “11-lik”də yer almır, bəziləri isə komandadan göndərilib. Bu da göstərir ki, Valdas Dambrauskas üçün ad-san yox, forma və rəqabət əsasdır.

Xüsusilə yerli futbolçuların durumu diqqət çəkir. Qışda Ayaz Quliyevin, Anatoli Nuriyevin, Camal Cəfərov, Rüstəm Samuqillinin "bayquşlar"dan ayrılması üzücü durumdur. Düşünmək olar ki, Valdas Dambrauskas yerlilərlə prinsip aparır. Amma Aleksey İsayev, Xəyal Əliyevin mütəmadi oynaması, Rəhman Daşdəmirov və Amin Seydiyevin sonradan meydana daxil olması bu fikri alt üst-edir. Azərbaycanlıların əsas heyətdə möhkəmlənə bilməməsi həm fərdi inkişaf, həm də peşəkar yanaşma baxımından suallar yaradır. Rəqabət artdıqca fiziki və mental baxımından inkişaf etməyən oyunçu geri düşür. "Sabah"ın hazırkı sistemi isə yalnız maksimum səviyyə tələb edir.

Yeni transferlər qısa zamanda əsas heyətə düşərək mövqelərini möhkəmləndiriblər. Bu da transfer siyasətinin düzgün qurulduğunu göstərir. Baş məşqçi faktiki olaraq komandada təmizlik apararaq daha dinamik, daha intizamlı və daha iddialı kollektiv formalaşdırıb.

46 xal, 4 xallıq üstünlük və paralel olaraq kubokda 1/4 final – bu statistika təsadüf deyil. “Bayquşlar” artıq bir mövsümlük komanda yox, sistemli şəkildə zirvəyə oynayan kollektivdir.

MƏHƏMMƏD HÜSEYNOV