Pyaniç 35 yaşında karyerasını başa vurdu

“Roma”, “Yuventus” və “Barselona”nın sabiq yarımmüdafiəçisi Miralem Pyaniç 35 yaşında karyerasını başa vurub.

Sport1.az xəbər verir ki, bosniyalı futbolçu artıq futbol agenti kimi fəaliyyətə başlamaq üçün təhsil alır. Onun bu barədə rəsmi açıqlaması olmasa da, mövcud məlumatlar bunu təsdiqləyir.

Pyaniçin son klubu Moskva təmsilçisi ÇSKA olub. O, 2024/2025 mövsümündə Rusiya komandasının heyətində çıxış etdikdən sonra müqaviləsinin başa çatması ilə azad agent statusu alıb.

Bir müddət əvvəl Pyaniçin “Yuventus”da müəyyən vəzifədə geri qayıda biləcəyi ilə bağlı xəbərlər yayılmışdı. Bu iddialar onun Turin klubunun məşq bazasında görüntülənməsindən sonra ortaya çıxmışdı. Lakin insayder Alfredo Pedulla həmin səfərin heç bir funksional məna daşımadığını, futbolçunun sadəcə dostlarını ziyarət etdiyini bildirib.

Qeyd edək ki, Miralem Pyaniç klub karyerası və Bosniya və Herseqovina yığmasının heyətində ümumilikdə 780 rəsmi matça çıxıb: 665 oyun klubların, 115 görüş isə milli komandanın hesabınadır. Oyunçu karyerasının ən parlaq dövrünü A Seriyasında keçirib – “Roma”da beş, “Yuventus”da isə dörd mövsümdə forma geyinərək 350-dən çox matçda 52 qola imza atıb.