Cahangir Fərəcullayevin xarabalığa çevirdiyi Azərbaycan futbolu - KÖŞƏ

Litva ilə 1:1-lik heç-heçədən sonra Ayxan Abbasov demişdi ki, qarşıda bizi çətin oyunlar gözləyir. Açığı, təəccüblənmiş, hətta əsəbiləşmişdim.

Kül mənim başıma! Ayxan müəllimin nə demək istədiyini başa düşməmişəm. Adam komandanın içindədir, hər şeyi bizdən yaxşı bilir. Demək istəyirmiş ki, Litva ilə 1:1 hesablı heç-heçəyə şükür edin. Ona görə millimizin baş məşqçisinin dost-tanışları komandamızın bir xal qazanmasına sevinir, toy-bayram edirmişlər.

Yəqin Ayxan müəllim onları başa salıb ki, yığmamızın üzvləri yalandan özlərini peşəkar adlandırırlar. Onlar futbol oynaya bilmirlər. Bəxtləri gətirib ki, Azərbaycanda doğulublar. Lixtenşteyndə yaşasaydılar, futbolçu olmaqla özlərini dolandıra bilməyəcək, bənna, malyar, elektrik və sair peşələrə üz tutacaqdılar.

Dünən də “cırtdan ölkə” ilə qarşılaşdıq. Onları da məğlub edə bilmədik. Rəqibin kapitanı Nikolas Hasler deyib ki, bizdə 2, Azərbaycan millisində isə 23 peşəkar futbolçu var.

Halaldır, vallah! Lixtenşteyndə doğulan kübar insandır. Deməyəcəkdi ki, bizdə 4-5 peşəkar futbolçu olsaydı, Azərbaycan millisinin meydanda məhv edərdik.

Dünən Ayxan Abbasov da diqqətçəkən açıqlaması ilə yadda qalıb. Deyib ki, futbolda başqa problemlər də var, vaxt hər şeyi göstərəcək. Çox sağ ol, Ayxan müəllim! Bu açıqlamaya görə sizə təşəkkür edirəm. Bəli, futbolumuzdakı tək problem millinin baş məşqçisi deyil.

Lazımsız “FIFA Series” turnirində çempionluğa uşaq kimi sevinən, “APL Fantasy”ni İnkişaf Strategiyasının əsas tərkib hissəsi adlandıran, islahat adı ilə federasiyaya dost-tanışlarını işə götürən, bunun üçün bir milyona yaxın təzminat ödəyən baş katibimiz var. 

Yadınıza gəlirsə, Cahangir Fərəcullayev indiki AFFA rəhbərliyinin ilk Hesabat Konfransında problemləri dilə gətirib, özünə xal qazanmışdı. İntellektual baş katibin bu fikri diqqətimi çəkmişdi: “Biz binanı təmir etmirik. Söküb, yenidən inşa edəcəyik!”

Sağ olsun, baş katib! Sözünün üstündə durub! Lixtenşteynlə oyunda göründü ki, Azərbaycan futbolunu söküb, dağıdıb! Amma yenidən inşa etmək əvəzinə talayaraq daha da xarabalığa çevirib!