Çex 43 yaşında karyerasını bərpa etdi
Futbol dünyasının tanınmış simalarından biri olan Petr Çex hokkey karyerasına qayıdıb.
Sport1.az xəbər verir ki, “Çelsi”, “Arsenal” və Çexiya millisinin əfsanəvi qapıçısı 43 yaşında Britaniyanın dördüncü divizion təmsilçisi “Harinqi Haskis”lə müqavilə imzalayıb. Çex hokkeydə də eyni mövqedə — qapıçı kimi çıxış edir.
London təmsilçisi onun buz üzərindəki beşinci komandasıdır. Daha əvvəl o, IV divizionda “Qilford Feniks”, III divizionda “Çelmsford Çiftins” və “Oksford Siti Stars”, eləcə də elit divizionda “Belfast Giants” klubunda forma geyinib.
Futbol üzrə İngiltərə Premyer Liqasının “quru oyunlar” rekordçusu olan Petr Çex, eyni zamanda Çexiya millisinin ən çox oyun keçirmiş futbolçusudur (124 matç). O, futbol karyerasını 2019-cu ildə başa vurmuşdu.
