Mahmudovdan emosional paylaşım: “Bu, sadəcə futbol deyil”

Azərbaycanın tanınmış ürək-damar cərrahı və millət vəkili Rəşad Mahmudov “Napoli” – “Qarabağ” görüşündən sonra sosial şəbəkədə komandanın çıxışını yüksək qiymətləndirən status paylaşıb.

Sport1.az xəbər verir ki, deputat oyunda göstərilən mübarizənin nəticədən daha dəyərli olduğunu bildirib. O, paylaşımında yazıb:

“Dünənki “Napoli” – “Qarabağ” oyunu 2:0 hesabı ilə rəqibin xeyrinə başa çatmış olsa da, həmin oyunu canlı izləyən hər kəsin mənimlə eyni fikirdə olduğuna inanıram. “Qarabağ” bu gecə meydanda dünyaya Azərbaycan əzmini, Azərbaycan ruhunu yaşatdı. Necə ki, 44 günlük Vətən müharibəsində övladlarımız torpaq uğrunda əzm və qətiyyətlə döyüşdülər, dünən də “Qarabağ” FK sanki eyni ruhla, eyni iradə ilə dünyanın ən köklü klublarından birinin meydanında vuruşdu”.

Millət vəkili qapıçı Mateuş Koxalskinin çıxışını xüsusi dəyərləndirib:

“Məncə, gecənin ilk qəhrəmanı qapıçımız Koxalski oldu. Onun inanılmaz reaksiyaları, möhtəşəm qurtarışları hər bir azərbaycanlının qəlbinə qürur hissi yaşatdı”.

O, Kevin Medinanın zədə sonrası göstərdiyi iradəyə də diqqət çəkib:

“Medinanın aldığı ağır zərbədən sonra meydanı tərk etməmək üçün göstərdiyi davranış çox fərqli idi, hər birimizi kövrəltdi. Bu anlar göstərdi ki, “Qarabağ” komandasının gücü yalnız oyundan yox, ruhdan, birlikdən, inancla mübarizədən gəlir”.

Sonda Mahmudov “Qarabağ”ın Avropa nəhəngləri ilə mübarizəsini milli xarakterin göstəricisi kimi dəyərləndirib və komandanı alqışlayıb:

“Əziz Qurban Qurbanov və komandası, əziz qardaşlar! Nəticə nə olur-olsun, biz sizinlə qürur duyuruq! Uduzsanız da qalibsiniz, çünki bu xalqın ürəyini, ruhunu layiqincə təmsil edirsiniz. Var olun!”