Futbolmuzda ədalət var - YAZI

"Sabah" - "Şamaxı" oyunu zamanı Masazır təmsilçisi azarkeşlərinin əlindən azuqələrini almışdı. 

Bununla bağlı paylaşım etmişdim. Həmin statusda da qeyd etmişdim ki, dünyanın heç yerində belə şey yoxdur. Yalnız qapaqlı və şüşə butulkaları arenaya buraxmırlar. 

"Ölkə futbolunun sabahı"nın bəzi dost dəstəsi şərhlərdə məni səhv çıxarmağa çalışırdılar ki, burada qeyri-adi heç nə yoxdur. Hətta misallar, nümunələr göstərməyə çalışırdılar.

AFFA İntizam Komitəsi bu gün keçirilən iclasda azarkeşlərin əlindən azuqələrin alınmasına görə "Sabah"a xəbərdarlıq edib:

"23.11.2025-ci il tarixində Misli Premyer Liqasında XII turun “Sabah” – “Şamaxı” oyununda tamaşaçılar tərəfindən gətirilmiş, stadiona gətirilməsi qadağan olunmamış əşyalar stadiona buraxılmadığına görə “Sabah” komandasına xəbərdarlıq edilsin (maddə 20)".

Bu qərara görə İK-da çalışanlara təşəkkür edirəm. "Sabah" birbaşa insan hüquqlarını pozurdu. Bu qərar ölkə futbolunda az da olsa, ədalətin olduğunu göstərdi.

İndi bir şeydən narahatam. Yaxın aylarda İK-da könüllü istefalar olsa, təəccüblənməyin...

İLKİN SULTANLI