Qvardiola: “Sabahkı oyun bizim üçün həlledici məqam ola bilər”

“Mançester Siti”nin baş məşqçisi Xosep Qvardiola Çempionlar Liqasının liqa mərhələsinin 5-ci turunda “Bayer”lə keçiriləcək matç öncəsi danışıb.

Sport1.az xəbər verir ki, ispaniyalı mütəxəssis klubun rəsmi saytına açıqlamasında qarşılaşmanın böyük əhəmiyyət daşıdığını bildirib:

“Liqa mərhələsinin önəmi çox böyükdür. İlk dörd qarşılaşmada fantastik performans göstərdik, hətta səfərdə “Monako”ya qarşı da çox yaxşı oynadıq. İndi son dörd matçımız qalıb: ikisi evdə, ikisi səfərdə. Sabah Bundesliqada üçüncü yerdə olan rəqibə qarşı oynayacağıq. Bu, son dərəcə vacib oyundur”.

Qvardiola komandanın liqa mərhələsində mövqeyini möhkəmləndirmək üçün lazım olan nəticələrdən də söz açıb:

“Sabah qələbə qazanmaq və əlavə bir xal toplamaq bizi liqa mərhələsinin yekununda ilk səkkizlikdə möhkəmləndirəcək. Sabah çox önəmlidir və nələr etməli olduğumuzu bilirik”.

Qeyd edək ki, “Mançester Siti” liqa mərhələsinin ilk dörd oyunundan sonra 10 xalla 4-cü pillədə qərarlaşır. “Bayer” isə 5 xalla aşağı sıralardadır.