İranda futbolçunun spirtli içki videosu qalmaqal yaratdı

İranın “Esteqlal” klubunun müdafiəçisi Armin Sohrabian sosial şəbəkələrdə yayılan görüntülərlə bağlı müvəqqəti olaraq komandadan kənarlaşdırılıb.

Sport1.az xəbər verir ki, thenewregion.com-un Fars agentliyinə istinadən yaydığı məlumata görə, videoda futbolçunun əlində içki dolu stəkanın görünməsi ölkədə ciddi narazılıq yaradıb. İranda alkoqol qadağan olunduğu üçün məsələ dərhal diqqətə götürülüb və klub tərəfindən intizam komitəsinə təqdim edilib. Araşdırma başa çatana qədər Sohrabian məşqlərdən uzaqlaşdırılıb.

30 yaşlı müdafiəçi şəxsi sosial media hesabında üzrxahlıq edərək bildirib ki, sözügedən görüntü bir neçə il əvvəl çəkilib və sonradan onun əleyhdarları tərəfindən yayımlanıb.

Qeyd edək ki, Sohrabian bu ilin yanvarında “Esteqlal”a qoşulub. O, daha əvvəl 2017–2019-cu illərdə və 2023/24 mövsümündə də klubun heyətində çıxış edib.